Li Oldenburgê hejmareke zêdeyê Êzidiyan bûn welatiyên Almanya

Oldenburg, 02.09.2025 – Li Oldenburgê, di sala 2024an de bi tevahî 1.067 kesan welatîbûna Almanî wergirtin û ev hejmar qet berê nehatiye tomar kirin. Zêdetirî nîvê kesên bûne welatî ji Iraq û Sûriyeyê ne. Li herêmê, ev bi piranî endamên civaka Êzidî ne, ku piştî revîn û çewisandinê xwe spartibûn welatê Almanyayê.

Navenda Şêwirmendiya Koçberiyê ya Foruma Êzidî ya Oldenburgê, ku bi salan e gelek kesan di rêya welatîbûnê de bi rê ve dibe – ji serlêdan û şêwirmendiya hiqûqî bigire heta piştgiriya di fêrbûna ziman û ezmûna "Jiyan li Almanyayê" de, roleke girîng di vê serkeftinê de lîst.

Ilyas Yanc, serokê Foruma Êzidî ya Oldenburgê, diyar dike ku "Ji bo gelek jin û mêrên Êzidî, welatîbûn ne tenê karekî hiqûqî ye, lê gavekî diyarker e ber bi ewlehî, tevlîbûn û aidiyeta domdar ve. Em serbilind in ku em wek Forum dikarin vê rêyê bi rê ve bibin."

Şêwirmendên li navenda şêwirmendiya koçberiyê jî her roj dibînin ka piştgiriyeke baş çiqas girîng e.

Jagar Abdo, şêwirmendê koçberiyê li Foruma Êzidî ya Oldenburgê, destnîşan dike ku "Em her roj dibînin ka şêwirmendî û piştgiriyeke pêbawer di pêvajoya welatîbûnê de çiqas girîng e. Welatîbûna serkeftî ya gelek kesan li Oldenburgê nîşan dide ku entegrasyon dikare ser bikeve dema ku piştgirî, motîvasyon û hevkariyeke baş bi rayedaran re pêk were," .

Foruma Êzidî ya Oldenburgê bi taybetî spasiya eyaleta Saksonya Jêrîn ji bo piştgiriya aborî ya navenda şêwirmendiyê, her weha spasiya bajarê Oldenburgê û bi taybetî Ofîsa Biyaniyan ji bo hevkariya wan a her dem pêbawer û avaker dike.