Îdrîs Nêçîrvan Barzanî Serdana Zanyarê Kurd Dr. Reşad Mîran Kir

Hewlêr – Îro 07.12.2025 Îdrîs Nêçîrvan Barzanî, li Hewlêrê serdana zanyarê navdar ê Kurd Dr. Reşad Mîran kir. Armanca serdanê, pîrozkirina wergirtina Xelata Navneteweyî ya Pûşkîn bû, ku Dr. Mîran wekî yekemîn Kurd ev xelat ji destê Serokê Rûsyayê wergirtibû.

Di dema serdanê de, Barzanî destkeftiya Dr. Mîran wekî serbilindiyek ji bo hemî Kurdistaniyan bi nav kir. Barzanî anî ziman ku destkeftiyên bi vî rengî, nimûneyên rastîn ên hewldanên zanistî û lêkolînên berdewam in, ku nasname, dîrok û çanda Kurdî di asta navneteweyî de zêdetir didin nasîn.

Xelata Pûşkîn, yek ji bilindtirîn xelatên fermî yên Rûsyayê ye ku ji aliyê Serokomarê Rûsyayê ve ji kesên jêhatî re tê dayîn. Ev xelat ji bo kesên ku di warên çand, zanist, huner û pêşxistina mirovahiyê de beşdariyên berçav û bibandor kirine, tê pêşkêşkirin.

Dr. Reşad Mîran, civaknas û zanyarekî jêhatî yê warê mirovnasî (etnografya) yê Kurd e. Ew di sala 1952an de li Şeqlawe ji dayik bûye. Bawernameya bekaloryosê ya xwe li Zanîngeha Bexdayê wergirtiye û master û doktoraya xwe jî di pisporiya etnografyayê de li Lenîngradê (Rûsya) qedandiye. Dr. Mîran di navbera salên 1993-2021an de, ango di heyama 28 salan de, mamostetî di Beşa Civaknasiyê ya Kolêja Edebiyatê ya Zanîngeha Selaheddîn de kiriye.

Herwiha, Dr. Reşad Mîran zêdetirî 30 pirtûk û lêkolînên zanistî û wergerandin weşandiye. Ew endamê damezrîner ê Komeleya Civaknasên Kurdistanê û Cîgirê Serokê Akademiya Kurdî bûye.