Pervîn Çakar Li Frankfurtê Konserek Taybet Dide: Ez Li Benda We Me!

Hunermenda navdar Pervîn Çakar, bi kêfxweşiyeke mezin ragihand ku ew ê li Clara Schumann Saal a Frankfurt am Main, Almanya, konserek taybet pêşkêş bike. Çakar, ku bi performansa xwe ya bi hêz û dengê xwe yê balkêş tê nasîn, temaşevanên xwe vexwend vê şeva muzîkê ya xweş.
Di daxuyaniya xwe de, Pervîn Çakar got: "Ez bi kêfxweşî radigihînim ku ez ê li Clara Schumann Saal li Frankfurtê konserekê bidim. Ez li benda we me." Wê diyar kir ku ew ê "Aryayên xweş ên opera & operetta û Stranên Kurdî bistirê."
Ji bo vê konsera taybet, hevala wê ya muzîkjenê hêja, Boram Ahn, dê bi Pianoyê re beşdarî Çakar bibe. Çakar, tevahiya dost, hezkiriyên xwe û gelê Kurd bi dilgermî vexwend vê bûyera çandî ya girîng, anî ziman ku ew pir kêfxweş e ku dê bi wan re vê şeva xweş parve bike.
Ji bo beşdarbûna konserê, temaşevan dikarin biletên xwe li ser malpera Pickaseat peyda bikin. Konser ji aliyê Pervin Chakar Music Production û Kooperationspartner: KG Rhein Mein e.V. ve tê organîzekirin. Ji bo agahdariya zêdetir, kes dikarin bi Ali Ekber Koç re ( +49 177 8937490) bikevin têkiliyê.
Pervîn Çakar, her wiha bi zimanê Elmanî jî vexwendnameyek belav kir û tê de got: "Ez pir li benda konsera xwe ya li Clara-Schumann-Saal li Frankfurtê me. Ez pir kêfxweş im ku dê gelek ji we bibînim. Ez ê aryayên opera û operetayên xweş û her wiha stranên Kurdî bistirêm. Hevaleke min a muzîkjen a hêja û jêhatî, Boram Ahn, dê bi piyanoyê re min hevaltiyê bike. Ez bi dilgermî heval, heyran û gelê Kurd vedixwînim ku guhdarî vê repertuara xweş û taybet bikin. Werin û hest bikin ka muzîk çawa dilan tîne cem hev."
Ev konser, ji bo dilxwazên muzîkê û gelê Kurd li Ewropayê, derfeteke bêhempa ye ku muzîka klasîk a cîhanî û stranên Kurdî yên kûr bi hev re bicivin.