Perwer Armed Dosye ya Şerefkendî ji nû ve Vedike

Komkujiya Mîkonos (Mykonos), ku şopeke kûr di dîroka siyasî ya Kurd de hiştiye, bi pirtûka nû ya rojnamevan-nivîskar Perwer Armed, "Xefika (Kemîna) Mîkonos – Perdeya Li Pişt Sûîqasta Dr. Sadıq Şerefkendî", careke din tê rojevê. "Xefika Mîkonos", ne tenê anatomiya sûîqastekê pêşkêş dike, lê di heman demê de, bi pêşkêşkirina hûrgiliyên balkêş ên derbarê hewildanên navneteweyîkirina doza Kurd û jeopolîtîka serdemê ya herêmî, ronahiyê dide dîroka nêzîk a Kurd.

Berhema nû ya rojnamevan-nivîskar Perwer Armed, "Xefika Mîkonos – Perdeya Li Pişt Sûîqasta Dr. Sadıq Şerefkendî", careke din komkujiya Mîkonos a 17ê îlona 1992an, şeva herî tarî ya dîroka siyasî ya Kurd li Berlînê, bi hemû aliyên xwe ve dinirxîne. Pirtûka ku ji Weşanên Dara derketiye, bi lêkolînên bejahî yên hûr, belgeyên arşîvê û şahidiyên ku cara yekem têne weşandin, doseya Dr. Sadıq Şerefkendî vedike.

Perwer Armed, li Almanya, Fransa, Swîsre, Swêd, Danîmarka û Avusturya 16 hevpeyvînên rû bi rû pêk anî û li ser 4 hezar rûpel dosyeyên dadgehê, raporên îstîxbaratî û rûpelên rojnameyan lêkolîn kir, û şopên sûîqastê şopand.

Pirtûk, ji bo nîqaşên "Doza Mîkonos" ku bi biryara girtinê ya li dijî rayedarên dewleta Îranê ya wê demê bi dawî bû û bû sedema krîzeke dîplomatîk di navbera Yekîtiya Ewropayê û Tehranê de, bi belge û şahidiyên nû re beşdariyeke girîng pêşkêş dike.

Jiyana Dr. Sadıq Şerefkendî û Bilindbûna Siyasî ya Wî

Berhem, hemû qonaxên girîng ên jiyana Dr. Sadıq Şerefkendî, yek ji kesayetiyên siyasî yên sereke yên dîroka nêzîk a Rojhilata Kurdistanê, bi hûrgilî dinirxîne: ji salên zarokatiya wî bigire heta serdema mamostetî û akademîsyeniyê, paşê bilindbûna wî di nava Partiya Demokrat a Kurdistana Îranê (PDKÎ) de û heta gera wî ya krîtîk a sala 1992an li Ewropayê.

Çar Rojên Krîtîk ên Ku Ber Bi Sûîqastê Ve Çûn

Beşa herî balkêş a pirtûkê, balê dikişîne ser çar rojên di navbera 14-17ê îlona 1992an de.

Dr. Sadıq Şerefkendî, di vê serdemê de beşdarî Kongreya Enternasyonal a Sosyalîst a li Berlînê bû û ji bo ku pirsgirêka Kurd di platforma navneteweyî de were bihîstin, têkiliyên dîplomatîk ên dijwar pêk anî.

Wêneyên Mam Celal ên Cara Yekem Tên Weşandin û Fikarên Ewlehiyê

Di pirtûkê de, têkiliyên di navbera Sekreterê Giştî yê Yekîtiya Niştimaniya Kurdistanê (YNK) û Serokomarê berê yê Iraqê Celal Talabanî (Mam Celal) û Dr. Sadıq Şerefkendî de, yên ku di nav delegeyên kongreyê de bûn, jî têne vegotin.

Wêneyên ku her du kes gelek caran di dema kongreyê de bi hev re hatine cem hev û sohbetên wan ên li resepsiyonê, cara yekem di vê pirtûkê de derketin holê.

Wekî hûrgiliyeke girîng, di pirtûkê de bi gotinên şahidan hatiye diyarkirin ku Celal Talabanî ji ber fikarên ewlehiyê pêşniyar kiriye ku Dr. Şerefkendî hevdîtina xwe ya bi muxalifên Îranî re li mala Nûnerê YNK’ê yê wê demê li Almanya, Salah Reşîd, pêk bîne, lê Dr. Şerefkendî ev pêşniyar bi gotina "Hevdîtin ji bo restoranteke Îranî hatiye amadekirin" red kiriye.

Kemîna Kujer a Li Restorana Mîkonosê

Piştî kongreyê, restoranta Mîkonosê, ku ji bo civînekê bi muxalifên Îranî re hatibû hilbijartin, heman şevê bû qada kemîneke kujer.

Pirtûk, bi rekonstrûksiyona saet bi saet a şeva sûîqastê, bêbiryarbûnên beriya bûyerê, hişyariyên ewlehiyê û planên ku di kêliya dawîn de guherîn, bi hûrgilî vedibêje.

Çîrokên jiyana Nûrî Dehkordî, Fettah Abdolî û Humayun Erdalan, yên ku tevî Dr. Şerefkendî hatin qetilkirin, jî cara yekem di vê pirtûkê de bi hûrgilî digihîjin xwendevanan.

Têkiliya Qasimlo û Şerefkendî û Biryara "Terora Dewletê"

Yek ji beşên balkêş ên pirtûkê jî têkiliya Dr. Ebdulrehman Qasimlo û Dr. Sadıq Şerefkendî bi aliyên siyasî û mirovî ve bi hûrgilî hatiye vegotin.

Nivîskar Perwer Armed, her du navan wekî hilgirên heman tevgerê yên di serdemên cûda de vedibêje.

Piştî ku Dr. Qasimlo di sala 1989an de li Viyanayê bi sûîqasteke bi heman rengî hat qetilkirin, tê destnîşankirin ku Dr. Şerefkendî berpirsiyariya PDKÎ’ê hilgirt û berdewamiya têkoşîna partiya xwe dabîn kir.

Di beşên dawî yên "Xefika Mîkonos" a 161 rûpelî de, biryara dîrokî ya Dadgeha Bilind a Eyaleta Berlînê ya 10ê Nîsana 1997an bi berfirehî tê nirxandin.

Di biryarê de, bi zelalî hatibû diyarkirin ku sûîqast "bi fermana rasterast û organîzasyona rêveberiya Tehranê hatiye kirin."

Ev biryar, di dîrokê de xaleke werçerxê bû, ji ber ku cara yekem bû ku dadgeheke li Ewropaya Rojava, sûîqasteke li dijî muxalifên dewletekê li welatekî din, wekî "terora dewletê ya fermî" bi nav kir.

Herwiha, gotinên xwediyê restoranta Mîkonosê, yê ku ji sûîqastê birîndar rizgar bû, yên ku ji polîs û dadgehê re dabû, jî cara yekem di vê pirtûkê de bi hûrgilî têne weşandin.

Pirtûk, ne tenê bi belgeyên nivîskî û şahidiyên şahidan; lê belê bi wêneyên cara yekem têne weşandin ên ciwaniya Dr. Şerefkendî, rojên wî yên li Tehranê û têkiliyên wî yên li Ewropayê, wêneyên salona kongreyê û cihê bûyerê, û herwiha posterên ku ji aliyê polîsê Berlînê ve hatine weşandin, ji bo dîroka nêzîk a Kurd bîreke dîtbarî jî datîne.