Mûsa Ehmed Pêşwaziya Şandeke Bilind a Navneteweyî Kir
Serokê Dezgeha Xêrxwazî ya Barzanî Pêşwaziya Şandeke Bilind a Navneteweyî Kir, Bal kişand Ser Rewşa Koçber û Penaberan
Hewlêr - Kurdistan – Serokê Dezgeha Xêrxwazî ya Barzanî, Mûsa Ehmed, îro Pêncşemê, 30ê Cotmeha 2025an, li Balafirgeha Navneteweyî ya Hewlêrê, pêşwaziya şandeke payebilind a navneteweyî kir. Armanca serdanê, ji nêz ve agahdarkirina li ser rewşa koçber û penaberên li Herêma Kurdistanê û pêşxistina karûbarên mirovî bû.
Şanda mêvan ji kesayetiyên girîng pêk dihat, di nav wan de Serdar Yuksel, endamê Parlamentoya Federal a Almanya, Klaus Engel, serokê berê yê Encumena Rêveberiya Giştî ya Şirketa Enerjiyê ya Evonik, Hîndrîk Grot, berpirsê dezgeha ragihandinê ya Schwäbische Medien û berpirsê rêxistina "Helfen bringt Freude" (Alîkarî Keyfê Tîne), Şêrzad Tomas, rêveberê giştî yê dezgeha Caritas – Essen li Iraqê, û Deniz Kartal, wênesaz û rojnamevan.
Di çarçoveya serdanê de, serdana kampên koçber û penaberan di rojeva şandê de cih girt, da ku ji nêz ve li rewşa wan, debara jiyana wan û pêwîstiyên wan ên sereke bê pirsîn.
Dezgeha Xêrxwazî ya Barzanî, ku wek pireke di navbera kesayetiyên cîhanî, rêxistinên mirovî û xêrxwaz û kesên hewcedar – çi koçber, çi penaber an jî xelkê xwecîhî – de kar dike, tekez kir ku ew berdewam e li ser xebatên xwe ji bo dabînkirina jiyaneke bi rûmet ji bo hemû wan kesan.
