Dr. Mehmûd Ebas: "Kurd koka erdê ne, derewa koçberiyê çeka Baas û Cûlanî ye"

Hewlêr - Kurdistan: Dr. Mehmûd Ebas di gotareke xwe ya nû de tekez kir ku gelê Kurd li herêma xwe xwediyê kok û dîrokeke kevnar e, û îdîayên li ser "koçberiya" wan weke dereweke ku ji aliyê rejîma Baasê ya berê û niha jî ji aliyê koma Cûlanî ve tê bikaranîn, bi nav kir. Ebas destnîşan kir ku ev tawanbarkirin, çekeke dijî rikeberên Kurd û têkoşîna wan a ji bo azadiyê ye.

Dr. Ebas di gotara xwe ya ku bi zimanê Erebî û li malpera Welatê Me de hatiye belav kirin balê dikişîne li ser wê yekê ku rejîma Baasê bi bikaranîna nivîskarên kirêgirtî û rûpelên sexte hewl dida navûdengê Kurdan xirab bike, û ev siyaset niha jî ji aliyê Heyet Tehrîr el-Şam, ku Cûlanî serokatiya wê dike, tê domandin. Wî got, "Rejîma berê û Cûlanî û peyrewên wî li ser xalekê dicivin: şerê gelê Kurd. Li wir, cûdahiya di navbera neteweperweriya erebî ya nîjadperest û tekfîrîzma îslamî ya tarî de winda dibe."

Ebas her wiha behsa propagandaya rejîma Esed kir ku Kurd "mêvan" in li Sûriyê û welatîbûn ji aliyê dewleta Sûriyê ve ji wan re hatiye dayîn, û diyar kir ku temenê dewleta Sûriyê ji sedsalekê zêdetir nîne û bi biryareke kolonyalîst a Fransî hatiye damezrandin. Wî rexne li wan kesan girt ku dîroka hatina eşîrên Ereb ên ku niha li Cizîra Kurdistanê ne ji bîr dikin.

Derbarê navê "Qendîl" de, Dr. Ebas destnîşan kir ku ji bo Cûlanî û peyrewên wî, "Qendîl" tê wateya her serokatiyek Kurdî û her dengek Kurdî ya bi bandor. Wî bal kişand ser ku Kurd ne xerîb in, ew kurên Kobanî, Qamişlo, Efrîn, Dêrik, Amûdê û Hesekê ne, û dema ku rûbirûyê vê rastiyê dibin, ew vedigerin îdîaya ku Kurd "koçber" in.

Dr. Mehmûd Ebas bang li gelê Kurd li Rojava Kurdistanê kir ku di parastina Sûriyê wekî welatekî demokratîk û bê Baas û tekfîriyan de zelal bin, û di heman demê de dirûşma yekîtiya Kurdistanê ya giştî bilind bikin. Wî got, "Qendîlî bi xwe Hewlêrî ye, Amedî ye, kurê Hesekê ye, kurê Mehabadê ye."

Ebas her wiha bang li hêzên Kurdî, bi taybetî Rêveberiya Xweser, heyeta Kongreya Qamişlo û Hêzên Sûriya Demokratîk (QSD) kir ku helwestên xwe bi zelalî di parastina herêmê û doza Kurdî de ragihînin, û tekez kir ku xemsarî di bihêzkirina sîstema nenavendî û federal de tê wateya "kuştina demokrasî li Sûriyê, û ji nû ve hilberandina îstîbdadê bi cilên nû."

Dr. Ebas li dawiyê diyar kir ku ev îstîbdada nû, ku di terorîzm û îdeolojiya tekfîrî de asê maye, ji îstîbdada neteweperest a nîjadperest a berê pir metirsîdartir e.