Semsûr Bajarê Bê Rawestgeh; Krîza Veguhestina Nav Bajêr!

Semsûr – Kurdistan: Rojnameya "Yeni Adıyaman"ê ragihand ku veguhestina nav bajêr li Semsûrê her roj vediguhere êş û azaran. Welatî di bin tava germ de li ser peyarêyan rûdinin û li dolmuşan (mîna mînîbus, taksiyê parvekirî) disekinin, ji ber ku ne rawestgehek bi rêkûpêk heye û ne jî dolmuş di wextê xwe de tên.

Hatice Zine Akgöz, di gotareke xwe de ji bo rojnameyê, rexneyên tund li rêveberiya bajêr girt û destnîşan kir ku nekarîne pêşkêşkirina xizmeteke bingehîn a wekî veguhestinê bikin, bêserûberiya rêveberiya bajêr eşkere ye.

Akgöz diyar kir ku her ku diçe rewşa veguhestinê li bajêr xerabtir dibe û ev yek ji bo welatiyan bûye pirsgirêkeke mezin a rojane. Ev rewş, nîşan dide ku kêmasiyên cidî di plansazî û rêvebirina xizmetên giştî yên bajêr de hene.