Kurdistan li ser rola xwe ya di projeya Rêya Pêşketinê de israr dike

Şandeya Hikûmeta Herêma Kurdistanê li Bexdayê, projeya (Rêya Pêşketinê) ligel berpirsên hikûmeta Iraqê gotûbêj kir.

Duh Çarşemiyê 27/8/2025, şandeyekî bilind yê Hikûmeta Herêma Kurdistanê, bi serokatiya Ano Cewher, Wezîrê Veguhestin û Gihandinê, bi mebesta gotûbêjkirina projeya stratejîk (Rêya Pêşketinê) ligel berpirsên hikûmeta Iraqê, gihişte Bexdayê.

Şandeya Hikûmeta Herêma Kurdistanê ligel Mihemed Elî Temîm, Cîgirê Serokwezîrê Iraqê û Wezîrê Planînê û Rezq Seadawî, Wezîrê Veguhestinê û hejmarek ji berpirsên têkildar ên hikûmeta Iraqê civiya.

Ano Cewher, Wezîrê Veguhestin û Gihandinê li Herêma Kurdistanê di daxuyaniyek rojnamevanî de ragihand ku civîna wan erênî bû, herwiha got: "Di civînan de li ser pêşniyara Mesrûr Barzanî, Serokê Hikûmeta Herêma Kurdistanê, li ser nêrîna fermî ya Hikûmeta Herêma Kurdistanê derbarê projeya stratejîk a (Rêya Pêşketinê) de hate israrkirin."

Wezîrê Veguhestin û Gihandinê amaje bi wê yekê jî kir: "Şandeya Herêmê ronî kir ku ji aliyê teknîkî ve, rêya Herêma Kurdistanê ber bi rojhilatê Çemê Dîcleyê ve, rêyek kurttir e û lêçûna wê jî kêmtir e, herwiha ji aliyê asayîşê ve ewletir e li gorî wê rêya çolê ku aliyên din pêşniyar kirine û dixwazin ji rojavayê Çemê Dîcleyê ve derbas bibe."

Ano Cewher behsa wê yekê jî kir: "Me li ser wê yekê li hev kirin ku raporek berfireh û tijî agahî pêşkêşî komîteya Bexdayê bikin, ku tê de aliyên erênî yên derbasbûna projeyê bi Herêma Kurdistanê re û bi taybetî nahiyeya Rizgarî ser bi îdareya serbixwe ya Zaxoyê û ji wir ber bi Tirkiyeyê ve, bi hûrgilî dê werin berçavgirtin, herwiha daxwaz ji komîteyê hatiye kirin ku serdana cihê pêşniyarkirî bike."

Wezîrê Veguhestin û Gihandinê li ser wê yekê israr kir: "Divê projeya (Rêya Pêşketinê) bêyî Herêma Kurdistanê neyê cîbicîkirin, ji ber ku heke bi Herêmê re derbas nebe, tu rêyek din nagihîje Tirkiyeyê."

Herwiha ronî kir: "Em dixwazin li şûna ku 10 an 12 kîlometre ji Kurdistanê derbas bibe, di deşta Neynewa re derbas bibe û ew pêkhateyên curbicur ên ku di bin destê DAIŞê de neheqîyeke mezin li wê deverê dîtine, ji projeya navborî sûd werbigirin û paşê were Sêmêlê û Dihokê û ber bi Zaxoyê ve biçe."

Derbarê projeya trênê de jî, Ano Cewher eşkere kir ku ligel Wezareta Avadanî û Niştecihkirinê bi hemahengî kar li ser dikin û şîrketeke Spanyayî dîzayn ji bo daniye. Her dema rewşa darayî guncaw be, rasterast, çi bi rêya veberhênanê be yan jî cîbicîkirina rasterast be, dê dest bi cîbicîkirinê were kirin.