Serokê Herêma Kurdistanê spasiya rola Serokê Desthilata Dadwerî dike

Her di berdewamiya hevdîtinên xwe yên li Bexdayê de, piştînîvroya îro sêşemê 05.05.2026, birêz Nêçîrvan Barzanî, Serokê Herêma Kurdistanê û şanda pê re, bi birêz dadwer Fayîq Zêdan, Serokê Civata Bilind a Dadwerî ya Iraqê re civiyan.
 
Di civînê de, rewşa siyasî û giştî ya welat hatin gotûbêjkirin. Herdu aliyan tekez kir ku serxwebûna desthilata dadwerî bingeheke sereke ye ji bo parastina desthilat û saziyên welat û aramî û mafên destûrî yên her kesî.
 
Serok Nêçîrvan Barzanî, rola birêz Serokê Desthilata Dadwerî ya parastina aramî û tenahiya siyasî û berjewendiyên bilind û nîştimanî yên welat bilind nirxand, her wiha spasiya birêz Zêdan kir ji bo rola wî ya girîng di çareserkirina probleman û dîtina hevfêmkirinê di navbera aliyan de.
 
Herdu aliyan tekezî li ser girîngiya serweriya yasayê û xebata di çarçoveya destûrê de kir wek tenê rê ji bo çareserkirina problemên welat û parastina mafên yasayî yên hemû pêkhateyan û qewareya federe û destûrî ya Herêma Kurdistanê.
 
Berdewamî û pêşvebirina harîkarî û hevahengiya navbera dezgeh û saziyên dadwerî yên federe û Herêma Kurdistanê, beşek din a civînê bû.