Serok Nêçîrvan Barzanî û Wezîrê Derve yê Sûriyeyê Rewşa Herêmê Gotûbêj Kirin.

Piştî nîvroya îro Şemî 14.02.2026 her di çarçoveya bernameya xwe de li Konferansa Asayîşê ya Mûnîhê, rêzdar Nêçîrvan Barzanî, Serokê Herêma Kurdistanê, digel birêz Esed El-Şeybanî, Wezîrê Derve yê Sûriyeyê civiya.

Di civînê de, peywendiyên Sûriyeyê digel Iraq û Herêma Kurdistanê, pêşhatên dawî ya rewşa Sûriyeyê û bandorên wê li ser aramî û ewlehiya herêmê hatin gotûbêjkirin. Herdu aliyan tekez li ser girîngiya çareserkirina qeyranên Sûriyeyê û parastina mafên hemû pêkhatan kirin.

Her di civînê de, rewşa mirovî ya koçberan û pêşxistina diyaloga neteweyî ji bo paşerojeke ewle ji bo welat hat gotûbêjkirin. Birêz Wezîrê Derve yê Sûriyeyê pesnê rola serkirdayetiya Herêma Kurdistanê ya ji bo rêkeftina Şam û Hêzên Sûriya Demokratîk (HSD) û alîkariya koçberan û hewlên wan yên ji bo parastina ewlehiya li herêmê de da.

Ji aliyê xwe ve, Serok Nêçîrvan Barzanî, hêviya serkeftin û aramî û ewlehiyê ji bo Sûriyeyê xwest, herwiha tekez li ser girîngiya parastina mafên Kurdan di destûra paşerojê ya Sûriyeya yekgirtî de kir.