Divê mafên Kurdan di destûra Sûriyeya paşerojê de bêne mîsogerkirin

Serokê Herêma Kurdistanê Nêçîrvan Barzanî Ji Ber Pevçûnên li Sûriyê Dilgiraniya Xwe Anî Ziman û Banga Agirbestê Kir û got: Divê mafên Kurdan û hemû pêkhateyan li Sûriyê parastî bin û di destûra Sûriyeya paşerojê de bêne mîsogerkirin

Serokê Herêma Kurdistanê Nêçîrvan Barzanî, îro, 20ê Çileya Paşîn a 2026an, daxuyaniyek belav kir û tê de dilgiraniya xwe ya mezin ji ber berdewamiya pevçûn û rûbirûbûnên leşkerî yên di navbera hêzên Artêşa Sûriyê û Hêzên Sûriyeya Demokratîk (HSD) de anî ziman.

Barzanî di daxuyaniya xwe de tekez kir ku "berdewamiya şer û pevçûnan metirsiyeke ciddî li ser aramî û ewlehiya Sûriyê û herêmê bi giştî çêdike û metirsiya vejîna DAIŞê careke din tîne holê."

Li gorî daxuyaniyê, ji destpêka derketina aloziyan ve, Herêma Kurdistanê bi berdewamî di pêwendiyê de ye ligel aliyên herêmî û navneteweyî ji bo rawestandina şer û pevçûnan. Serok Barzanî dubare kir ku "şer û rûbirûbûnên leşkerî tu pirsgirêkan çareser nakin û rewşê aloztir dikin," û destnîşan kir ku divê rêya diyalog û lihevkirinê ji bo çareserkirina pirsgirêkan bi aştiyane were girtin.

Nêçîrvan Barzanî ji Hevpeymaniya Navdewletî daxwaz kir ku erka xwe ya parastina ewlehiyê û rêgirtina li vejîna DAIŞê pêk bîne. Herweha amaje bi amadebûna Herêma Kurdistanê kir ku "hemû alîkarî û piştgiriyê pêşkêş bike bi mebesta rawestandina şer û gihîştina agirbest û lihevkirinekê."

Di dawiya daxuyaniya xwe de, Serokê Herêma Kurdistanê tekez kir ku "divê mafên Kurdan û hemû pêkhateyan li Sûriyê parastî bin û di destûra Sûriyeya paşerojê de bêne mîsogerkirin."

Daxuyaniyek Ji Serokê Herêma Kurdistanê

Em li Herêma Kurdistanê bi dilgiraniyeke mezin ve li berdewamiya pevçûn û rûbirûbûnên leşkerî yên di navbera hêzên Artêşa Sûriyê û Hêzên Sûriyeya Demokratîk (HSD) de dinêrin. Berdewamiya şer û pevçûnan metirsiyeke ciddî li ser aramî û ewlehiya Sûriyê û herêmê bi giştî çêdike û metirsiya vejîna DAIŞê careke din tîne holê.

Ji destpêka derketina aloziyan ve em bi berdewamî di peywendiyê de ne ligel aliyên herêmî û navneteweyî ji bo rawestandina şer û pevçûnan û girtina rêya diyalog û lihevkirinê bi armanca çareserkirina pirsgirêkan bi aştiyane. Em dubare dikin ku şer û rûbirûbûnên leşkerî tu pirsgirêkan çareser nakin û rewşê aloztir dikin.

Em ji Hevpeymaniya Navdewletî daxwaz dikin ku erka xwe ya parastina ewlehiyê û rêgirtina li vejîna DAIŞê pêk bîne, herweha em dubare dikin ku em amade ne ku hemû alîkarî û piştgiriyê pêşkêş bikin bi mebesta rawestandina şer û gihîştina agirbest û lihevkirinekê. Em tekez dikin ku divê mafên Kurdan û hemû pêkhateyan li Sûriyê parastî bin û di destûra Sûriyeya paşerojê de bêne mîsogerkirin.

Nêçîrvan Barzanî
Serokê Herêma Kurdistanê
20.01.2026