Li Kolnê Xwepêşandaneke bi milyonan saz dikin

Konfederasyona Revenda Kurdistanî bangewaziyek lezgîn ji hemû Kurdên li diyasporayê re belav kir, tê de êrîşên dawî yên Artêşa Erebî ya Sûriyê û komên şovenîst û tundrew li ser Rojavayê Kurdistanê bi tundî şermezar kirin. Konfederasyona Revenda Kurdistanî diyar kir ku ew êrîş ne tenê kiryarên leşkerî ne, lê hewldanên eşkere ne ji bo şikandina rûmeta Kurd, têkbirina demografiyê û kuştina welatiyên bêguneh, yên ku bi salan ji bo aştiya cîhanî û li dijî terorîstên DAIŞê qurbanîyên mezin dane.
Di daxuyaniya Konfederasyonê de hat gotin ku ew li ser riya neteweyî û niştimanî berdewam in, û wekî Cenabê Serok Mesûd Barzanî her dem tekez dike, parastina gelê Kurd û rûmeta neteweyî li her çar parçeyên Kurdistanê erka wan e.
Banga Ji Bo Çalakî û Zextê
Konfederasyona Revenda Kurdistanî bang li Kurdên welatparêz ên li diyasporayê dike ku li her welat û bajarî yê cîhanê bin, bi hev re û bi yekdengî, beşdarî hemû xwepêşandan û çalakiyên sivîl bibin. Van çalakiyan divê li gorî qanûnên sivîl ên welatên mazûban û bi awayekî aştiyane li dijî êrîşên artêşa Sûriyê û ji bo piştgiriya gelê Rojava bên lidarxistin.
Herweha daxwaz ji Kurdan tê kirin ku bi awayekî nûjen û bêyî bikaranîna dirûşmên tundûtûjiyê, zextê li hikûmet, parleman û navendên biryarder ên wan welatan bikin ku tê de dijîn.
Konfederasyona Revenda Kurdistanî herweha ji civaka navneteweyî daxwaz kir ku bi lez werin ser xetê ji bo rawestandina vê komkujiyê û parastina welatiyên bêguneh ji koçberiya bi darê zorê.
Raporên Fermî û Çalakiyên Pêşerojê
Konfederasyonê ragihand ku wan bi awayekî fermî name û raporên berfireh derbarê rewşa metirsîdar a Rojava de pêşkêşî navendên biryarder ên Ewropayê û saziyên navneteweyî kirine. Di daxuyaniyê de hat tekezkirin ku dîrokê îspat kiriye ku tundûtûjî nabe cihgirê diyaloga siyasî û mafên rewa nayên tepisandin.
Wekî beşek ji van çalakiyan, Konfederasyona Revenda Kurdistanî dê li her du bajarên Koln û Hanover ên Almanyayê mezintirîn xwepêşandan û nerazîbûnê li dijî êrîşên Şamê yên li ser Rojavayê Kurdistanê lidar bixe. Konfederasyona Revenda Kurdistanî ji Kurdistaniyên diyasporayê daxwaz dike ku hemû bi coş û hêz beşdarî van xwepêşandanên berfireh bibin.
Daxuyaniya Konfederasyona Revenda Kurdistanî bi dirûşma "Serfirazî ji bo Kurd û Kurdistanê!" bidawî bû û naveroka wê wiha ye:

Bangewaziyek Ji Konfederasyona Revenda Kurdistanî Ji Bo Hemû Kurdên Diyasporayê

Kurdistaniyên Hêja yên Diyasporayê,

Gelê Kurd ê Têkoşer,

Konfederasyona Revenda Kurdistanî, çawa ku di rabirdûyê de her dem eniyeke zexm bû ji bo yekkirina dengê Kurd û piştgireke bê şert û merc ji bo hemû parçeyên Kurdistanê, îro jî li ser heman riya neteweyî û niştimanî berdewam e. Em ji nerîna wê baweriya bêguhertin ku Cenabê Serok Mesûd Barzanî her dem li ser israr dike, ew jî parastina gelê Kurd û rûmeta neteweyî li her çar parçeyên Kurdistanê ye, weke erka xwe dizanin ku di vê kêliya hesas de dengê xwe bilind bikin.

Em êrîşên hovane yên Artêşa Erebî ya Sûriyê û yên şovenîst û tundrew li ser Rojavayê Kurdistanê û xelkê sivîl ê wan deveran bi tundî şermezar dikin, ku tê de komkujî û tawanên li dijî mirovahiyê tên kirin. Ev êrîş ne tenê kiryareke leşkerî ne, lê hewldaneke eşkere ne ji bo şikandina rûmeta Kurd, têkbirina demografiyê û kuştina welatiyên bêguneh ku bi salan qurbanîyên mezin dane ji bo aştiya cîhanê û parastina mirovahiyê li dijî terorîstên DAIŞê.

Kurdên Welatparêz ên Diyasporayê,

Konfederasyona Revenda Kurdistanî ji we daxwaz dike ku li her welat û bajarî yê cîhanê bin, bi hev re û bi yek dengî, beşdarî hemû wan xwepêşandan û çalakiyên sivîl bibin ku li gorî qanûnên sivîl ên wan welatan û bi awayekî aştiyane li dijî êrîşên artêşa Sûriyê û ji bo piştgiriya xwişk û birayên me yên li Rojava tên lidarxistin.

Herweha bi awayekî nûjen û bêyî bikaranîna dirûşmên tundûtûjiyê, zextê li hikûmet, parleman û navendên biryarder ên wan welatên ku tê de dijîn bikin.

Herweha ji civaka navneteweyî daxwaz bikin ku bi lez werin ser xetê ji bo rawestandina vê komkujiyê û parastina welatiyên bêguneh ji koçberiya bi darê zorê.

Em weke Konfederasyon, radigihînin ku me bi awayekî fermî name û raporên berfireh derbarê rewşa metirsîdar a Rojava de pêşkêşî navendên biryarder ên Ewropayê û saziyên navneteweyî kirine. Dîrokê îspat kiriye ku tundûtûjî nabe cihgirê diyaloga siyasî û mafên me yên rewa nayên tepisandin.

Bila em hemû bi hev re bibin dengê mezlûmiyeta Rojava û nehêlin ku gelê me careke din rûbirûyî jenosîdê bibe.

Em radigihînin, ku li her du bajarên Koln û Hanover ên Almanyayê, Konfederasyona Revenda Kurdistanî dê mezintirîn xwepêşandan û nerazîbûnê li dijî êrîşên Şamê yên li ser Rojavayê Kurdistanê lidar bixe, loma ji Kurdistaniyên diyasporayê daxwaz dike ku hemû bi coş û hêz beşdarî wê xwepêşandana berfireh bibin.

Serfirazî ji bo Kurd û Kurdistanê!

Konfederasyona Revenda Kurdistanî
20.01.2026