Federalîzm Dikare Bibe Çareseriyek Ji Bo Yekîtiya Sûriyeyê

Qamişlo - Kurdistan: Li bajarê Qamişlo, li Rojavayê Kurdistanê, semînarek berfireh li ser federalîzmê û pêkanîna wê li Sûriyeyê hat lidarxistin. Beşdarên semînerê tekezî li ser wê yekê kirin ku sîstema navendî ya heyî welat parçe dike, û federalîzm dikare bibe çareseriyek ji bo yekîtiya Sûriyeyê.

Li gorî nûçeyên K24, Fewza Yûsif berî semînerê anîbû ziman ku "cîbicîkirina sîstema navendî Sûriyê parçe dike." Ev nêrîn di semînera ku li bajarê Qamişlo hate lidarxistin de jî bû mijara gotûbêjê. Semîner bi beşdariya hejmareke mezin ji siyasetmedar, rewşenbîr û welatiyên Qamişloyê pêk hat. Axaftvanan tekezî li ser wê yekê kirin ku sîstema desthilatdariya navendî ya heyî ne mayînde ye û dikare bibe sedema cudahiyên mezhebî û olî.

Yek ji beşdarên semînerê, ku ji medyayê re axivî, got: "Rastî, ev karê ku îro li vir tê kirin, deriyekî nû vedike ji bo çareserkirina pirsgirêka Kurdî bi taybetî û pirsgirêka Sûriyeyê bi giştî." Wê herwiha anî ziman ku pêwîst e Kurd di vê pêvajoyê de destpêşxeriyê bikin û bixebitin ji bo bicihanîna federalîzmê ku ji bo hemî pêkhateyan çêtir e. "Dema dibêjin federalîzm, bila ji bo Sûriyeyê bi giştî be. Em dixwazin Hikûmeta Sûriyeyê jî vê yekê qebûl bike."

Beşdarekî din ê semînerê jî kêfxweşiya xwe ji beşdarbûna xwe anî ziman û got: "Ez kêfxweşim ku min beşdarî vê semînerê kir. Hejmareke mezin ji xelkê Qamişlo amade bûn. Ez bawer im ev rûniştin û semîner gelek girîng in ji bo xelkê Sûriyeyê, ji bo dîtina baştirîn sîstema hukûmranî li welatê wan." Wî herwiha destnîşan kir: "Ez bawer im federalîzm baştirîn rê ye ji bo komkirina hemû pêkhateyên Sûriyeyê ku di yek welatî de bin. Li vir, xelkê Sûriyeyê dizane ku federalîzm bi ti awayî ne wateya cudabûn an parçekirina Sûriyeyê ye."

Semînerê ronahî xist ser pêwîstiya dîtina çareseriyên siyasî yên domdar ji bo Sûriyeyê ku piştî şerekî dirêj hê jî di nava aloziyê de ye.