Tenduristiya Beşikçî Ber Bi Başiyê Ve Diçe; Kurdistan Di Fikra Wî De Derneketiye

Diyarbekir - Kurdistan: Îbrahîm Gurbuz, Serokê Weqfa Îsmaîl Beşikçî, îro li ser rewşa tenduristiya zanayê navdar ê Kurd, Îsmaîl Beşikçî, axivî û ragihand ku rewşa wî ber bi başiyê ve diçe. Gurbuz anî ziman ku Beşikçî piştî krîza dil a ji nişka ve, niha li nexweşxaneyê tê dermankirin û her çend pêşveçûnên erênî hebin jî, pêwîstiya wî bi tedawiya fîzyoterapî heye.

Gurbuz diyar kir ku sê roj berê, Îsmaîl Beşikçî dema ku ji bo beşdarbûna panel û bernameyan li Diyarbekirê bû, krîza dil derbas kir. Wî got, "Nêzîkî du saet berê, em heyetekî çûn cem Îsmaîl Beşikçî. Di heyetê de parlamenterê CHP'ê Sezgîn Tanrıkulu, Dr. Gencettin û ez bûn. Em çûn me serdana wî kir. Me dît ku rewşa wî baş bû."

Gurbuz ragihand ku doktoran destnîşan kirine ku di laşê Beşikçî de ne xwîn kêm bûye û ne jî tansiyona wî zêde bûye. Her wiha got: "Doktoran hêviyên baş dan me. Îro du caran baştir bûye. Em hêvî dikin ku sibê ji îro baştir bibe." Gurbuz herwiha tekez kir ku rewşa wî pêwîstiya wî bi emeliyatê nîne, lê belê divê tedawiya fîzyoterapî wergire.

Piştgiriya Berfireh Ji Bo Beşikçî

Gurbuz bal kişand li ser piştgiriya berfireh a ji bo Îsmaîl Beşikçî ji aliyê gelê Kurd û rayedarên Kurdistanê ve. Wî got, "Serokwezîrê Kurdistanê Mesrûr Barzanî jî pêwendî bi me re kir û rewşa Beşikçî pirsî." Wî herwiha destnîşan kir ku gelek kesayetiyên Kurd, wek Nêçîrvan Barzanî Serokê Herêma Kurdistanê, Mihemedê Hacî Mahmut, û rêxistinên Kurd li hemû dinyayê, herwiha li Kurdistanê jî, peyamên piştevaniyê şandine.

Beşikçî: Mamosteyekî Bêhempa yê Doza Kurd

Îbrahîm Gurbuz, li ser girîngiya Îsmaîl Beşikçî ji bo doza Kurd sekinî û wî wek "Sokratesê Kurdistanê" û "Ehmedê Xanî yê îro" bi nav kir. Wî got, "Beşikçî ne tenê yek ji Kurdan e, lêbelê ji bo Kurdan û Kurdistanê pir dixebite. Kurdistan qet ji fikra Îsmaîl Beşikçî derneketiye. Hemû jiyan, ruh, raman û fikra wî li ser vê ye."

Gurbuz anî ziman ku Beşikçî zêdetirî 65 sal e arşîveke mezin a Kurdî amade kiriye û Weqfa Îsmaîl Beşikçî jî di sala 2000'an de hatiye damezrandin. Wî got ku di vê arşîvê de 20 hezar pirtûk, 3 hezar kovar û rojname, û gelek belgeyên dîrokî hene. Gurbuz daxwaz kir ku Kurd van berhemên Beşikçî bêtir bixwînin û bi wî zêdetir nas bikin, da ku fikr û zanîna wî bibe rêber ji bo gelê Kurd.

Gurbuz bi van gotinan axaftina xwe bi dawî anî: "Beşikçî, bi rastî jî, xwediyê îradeyeke xurt e, ji dil ji bo Kurdan dixebite. Ez bi xwe jî heta sala 90'î mudaxaleyî karê wî nekiribûm. Lê piştî sala 90'î ez jî beşdar bûm. Heta dawiya emrê xwe ez ê di xebata wî ya Kurdolojiyê de bixebitim."