Ji ber çi gelek kes hewes dikin bibin siyasetmedar?

Ew ê ku di jiyana siyasî ya Herêma Kurdistanê de diqewimin û xuya ne, tiştên pir ecêb û balkêş in ku li ti cihekî din ê cîhanê nayên dîtin. Medya civakî û hin platformên televîzyonê yên bi navê şirovekar di vê qada elektronîk de ji bo wan û hin kesên din li Herêma Kurdistanê bûne bazarek germ da ku xwe wek siyasetmedar û dilxwazên mezin ên vî gelî bidin nasîn.

Ev rast e ku ne tenê li Herêma Kurdistanê lê li seranserê cîhanê jî mirov baweriya xwe bi siyaset û siyasetmedaran winda kiriye û dibêjin: "Di daxuyaniyên siyasetmedaran de gelek zehmet e ku meriv di navbera rastî û xeyalê de cudahiyê bike."

Lê ew qontraçiyên li cem me yên ku dixwazin bibin siyasetmedar dizanin ku welatî li Herêma Kurdistanê helwesteke neyînî û tund li hember siyasetmedaran û partiyan heye û baweriya wan bi wan pir kêm bûye. Ji ber vê yekê, ev derfeteke zêrîn e ji bo wan qelemşêrên xapînok ku xwe bikin berdevkên gel.

Lê bi baweriya min, ew kesên munafiq in û girîngiyê didin siyasetê û dixwazin bibin siyasetmedar ne ji bo xizmeta gel û welat! Belku ji bo bidestxistina bandor û pereyan li ser hesabê jiyana welatiyan û paşeroja wan, û ji bo siwarbûna pêla nerazîbûna xelkê û xwe berbijêrkirinê di hilbijartinan de.

Ew wekî me dizanin ku baweriya welatiyan bi partiyan û desthilat û siyasetmedaran pir kêm bûye û taqeta wan nemaye ku serdana baregehên partiyan bikin, bibin endam û beşdarî dengdanê di hilbijartinan de bibin. Ji ber vê yekê ev koma sextekaran xwe kirine leheng û xilaskar ji bo vî miletê westiyayî û hêrsbûyî...

Bi rastî dem hatiye ku siyasetmedar û berpirs ji birca fîlan dakevin û dev ji wê cudahiya di navbera xwe û welatiyan de berdin û êdî rê nedin kesên bêkêr. Berpirs berî ku li neynikê binihêre, divê dev ji awaza pozbilindî û gefa li hember hêrsa gel berde, ji ber ku eger ev hêrs wek komployek were dîtin, wê hingê ew berpirs di xeyalê de asê maye û di nav wê gulguloka armanckirî de dijî ku wî bi xwe ji bo xwe çêkiriye.

Mixabin hin berpirs ne tenê bersiva gilî û gazinên welatiyan nadin, wan gihandine wê astê ku telefon û deriyên xwe digirin. Baş e, eger yek pirsgirêkek wî hebe wê bi ku ve biçe?! Berpirs gava ku ew post wergirtiye ji bo xizmeta wan e!!

Hêmana herî girîng ku baweriyê vedigerîne ev e ku hûn xelkê razî bikin ku ev welat jî yê wan e û ew dikarin beşdarî guhertinên baştir bibin, û hemî civak li beramber qanûnê wekhev in, û her weha ji bo vegerandina baweriyê divê li beramber civakê hewldanên bêwestan bêne kirin ji bo kêmkirina newekheviya aborî û civakî û kes xwe di nav civakê de biyanî hîs neke.

Rêya vegerandina baweriyê du alî ye: ji berpirs ve ji bo welatiyan di gotarek nû de ku ji wan re bibêje: "Hûn bûn ku we ez gihandim vî postî û mayîna min bi we ve girêdayî ye." Aliyê din jî ev e ku hûn xelkê razî û qane bikin ku ev gotar ne tenê gotin e lê kiryar e.

Di demên aloziyê de wekî ya niha ku em tê de dijîn, bawerî bi peyv û kiryarê tê pîvandin. Ne tenê bes e ku berpirs di rewşa biryardariyê de be, lê divê amade be ku derkeve pêşberî kamerayê û di kêliyên alozî û nebaş de barê giran ê şîrovekirin û zelalkirin û analîzkirina rewşa nebaş, ji ser xwe rake û bersiva wan pirsan bide ku welatî dixwazin û ev pêwîstiyeke neteweyî ye.

Mihemed Xoşnaw