Mûsa Ehmed: Em hatine di hemû warî de xizmeta xelkê xwe bikin

Dezgeha Xêrxwaziyê ya Barzanî: Zêdeyî 100 Kamyon Alîkarî Gihandin Rojavayê Kurdistanê, Xebatên Berdewam in

Qamişlo – Kurdistan: Di hevpeyvînekê bi ARTA Radio û rojnamevan Dilda Yusiv re, Mûsa Ehmed, Serokê Dezgeha Xêrxwaziyê ya Barzanî (BCF), ragihand ku dezgeha wan di demeke pir kurt de zêdeyî 114 kamyon alîkarî gihandiye Rojavayê Kurdistanê û heta niha bi deh hezaran kes ji van alîkariyan sûd wergirtine. Ehmed tekez kir ku xebatên alîkariyê dê bê navber bidomin û bernameyên wan ji bo hemî deverên hewcedar berfireh in.

Alîkariyên Berfireh û Belavkirina Bilez

Mûsa Ehmed diyar kir ku di destpêkê de 67 kamyon alîkarî derbasî Rojava bûne û paşê ev hejmar gihîştiye 114 kamyonan. Herwiha, hejmarek karwanên sotemeniyê jî ji bo herêmê hatine şandin. Ehmed destnîşan kir ku BCF di warê lojîstîkê de xwedî tecrûbeyeke mezin e û ew dikarin alîkariyan di zûtirîn dem de bigihînin cihên hewcedar.

Di nav alîkariyan de 22 cureyên cuda hene, wek doşek, betanî, xwarinên hişk, kelûpelên paqijiyê, kelûpelên malê û komên metbexê. Her malbatek ji pênc kesan pêk tê, alîkariya têra 10 rojan wergirtiye. Musa Ehmed tekez kir ku alîkarî ne tenê di kampan de, lê li her mal, dibistan û navendên giştî yên li Qamişlo, Amûdê, Dêrik û Girkê Legê jî hatine belavkirin.

Rewşa Mirovî ya Dijwar û Bersiva BCF

Ehmed bal kişand ser rewşa mirovî ya giran li Rojava, ku ji ber şer û pevçûnan xelkê ji malên xwe bûne û bi sermayê, kêmbûna avê û ceyranê re rû bi rû ne. Wî anî ziman ku rewşa li Efrîn û Kobanê ji ber bûyerên dawîn hê xirabtir bûye.

Ji bo bersivdayîna van hewcedariyan, BCF tîmeke ji 150 kesan li Qamişloyê bi cih kiriye û rojane 10 heta 12 tîmên belavkirinê li ser herêman digerin. Tîmên tenduristiyê jî, ku niha sê tîm in, dermankirina koçberên nexweş li Amûdê pêşkêş kirine û rewş li wir di bin kontrolê de ye. Musa Ehmed ragihand ku 536.000 lître mazot jî hatine belavkirin ji bo germkirin û pêdiviyên din.

Hevkariya Navneteweyî û Pêşeroj

Serokê BCF destnîşan kir ku wan bi rêxistinên navneteweyî, wek UNHCR, re hevkariyeke bihêz çêkirine. Wî got, UNHCR ji awayê kar û belavkirina alîkariyan ji aliyê BCF ve pir kêfxweş bûye.

Mûsa Ehmed amaje bi rola gelê Kurd ê li seranserê cîhanê kir, ku bi hestên xwe yên mirovî piştgiriyê didin xelkê Rojava. Wî herwiha spasiya Hikûmeta Herêma Kurdistanê, nemaze Serokwezîr Mesrûr Barzanî, kir ji bo piştgiriya wan a berdewam.

Di dawiya axaftina xwe de, Ehmed got armanca sereke ya BCF ne tenê gihandina alîkariyan e, lê belê ew dixwazin bi rêya projeyên perwerde, teknolojî û peydakirina kar, derfetan ji ciwanên Rojava re biafirînin û xelkê xwe bi hêz bikin. Wî hêvî kir ku di pêşerojê de ew ê karibin karwanên alîkariyê yên hê mezintir bigihînin Kobanê û hemî herêmên hewcedar.

https://www.facebook.com/reel/841104065591667