Serok Barzanî hêvîdar e ku Iraq bikeve ser rêya xwe ya rast

Serok Mesûd Barzanî îro, Çarşemê 12.11.2025, bi boneya serkeftina pêvajoya hilbijartinên Encûmena Nûneran a Iraqê, peyameke pîrozbahiyê belav kir. Di peyama xwe de, Barzanî pîrozbahî li welatiyên Kurdistanê û hemû Iraqê kir û hêviya encamên erênî ji bo paşeroja welêt anî ziman.

Serok Barzanî di destpêka peyama xwe de, ku bi navê Xwedayê Mezin û Dilovan dest pê kir, pîrozbahî li hemû welatiyên hêja yên Kurdistanê û Iraqê kir. Wî herwiha destnîşan kir ku ev serkeftin a malbatên serbilind ên şehîdan, Pêşmergeyên qehreman û hemû çînên civaka Kurdistanê ye.

Di beşeke din a peyama xwe de, Serok Barzanî spasiyên xwe yên taybet pêşkêşî serkirdayetî, endam, kadro û cemawera Partî kir. Wî herwiha bal kişand ser rola girîng a saziyên ewlehiyê û hemû aliyên peywendîdar, ku bi xebat û keda xwe ya bêrawestan, atmosfereke aram û ewlehî ji bo encamdana hilbijartinê amade kirin.

Serok Barzanî hêviya xwe anî ziman ku ev hilbijartin û encamên wê bibin sedem ku Iraq bikeve ser rêça xwe ya rast û paşerojeke geş li benda gelê Iraqê be.

Peyama Serok Barzanî wiha ye:

Bi navê Xwedayê Mezin û Dilovan

Bi boneya serkeftina pêvajoya hilbijartinên Encûmena Nûneran a Iraqê, pîrozbahiyê li welatiyên hêja yên Kurdistanê û hemû Iraqê dikim. Herwiha, pîrozbahiyê li malbatên serbilind ên şehîdan û Pêşmergeyên qehreman û hemû çînên Kurdistanê dikim.

Li vir, bi pêwîstî dizanim spasiya serkirdayetî, endam, kadro û cemawera Partî bikim. Herwiha spasiya saziyên ewlehiyê û hemû aliyên peywendîdar dikim ku bi xebat û keda xwe, atmosfereke aram û ewlehî ji bo pêvajoya hilbijartinê peyda kirin. Hêvîdar im ku ev hilbijartin û encamên wê bibin sedem ku Iraq bikeve ser rêça xwe ya rast.

Mesûd Barzanî

12.11.2025