Ciwan Haco Daxwazek Ji Gelê Kurdên Li Kolnê Dike

Koln - Almanya: Hunermendê navdar ê Kurd, Ciwan Haco, peyameke piştgiriyê ji bo bernijêr û namzeta şaredariya bajarê Kolnê, Bêrîvan Aymaz, belav kir û daxwaz ji hezkiriyên xwe yên li wî bajarî kir ku di tûra duyem a hilbijartinan de dengê xwe bidin Aymaz.

Di peyama xwe de, Ciwan Haco wiha got: "Heval, hogir û hezkiriyên min ên li Kolnê, Hevala min a hêja Bêrîvan Aymaz li bajarê we namzeta şaredariya bajarê mezin e. Di 28'ê Îlonê de tûra duyem a hilbijartinan tê lidarxistin – û bi piştgiriya we Bêrîvan dikare bibe şaredara bajarê mezin a Kolnê."

Haco bal kişand ser girîngiya her dengekî û bang li piştgirên xwe kir ku bi berpirsiyarî tevbigerin. Wî got: "Banga min li we, ji kerema xwe di 28'ê Îlonê de herin û dengê xwe bidin Bêrîvan Aymaz! Her dengek girîng e." Wî herwiha bi Almanî jî di dawiya peyama xwe de dubare kir: "Am 28. September Berîvan Aymaz wählen!" (Di 28'ê Îlonê de deng bidin Berîvan Aymaz!)

Bêrîvan Aymaz, namzeta Partiya Kesk (Bündnis 90/Die Grünen) ya ji bo şaredariya Kolnê, di tûra yekem a hilbijartinan de gelek deng bi dest xistibû û ji bo tûra duyem derbasî qonaxa dawî bûye. Piştgiriya Ciwan Haco, ku li Ewropayê xwedî bingeheke mezin a guhdaran e, tê çaverêkirin ku bandoreke erênî li ser hilbijartina Aymaz bike, nemaze di nav civaka Kurd û yên din ên ku hunera wî dişopînin de.