Huseyîn Baybaşîn: Rewşa Kurdan û Daxwaza Dewleteke Serbixwe

New York - Amerika: Huseyîn Baybaşîn, li ser axaftinên serokên dewletên cîhanê yên di 80emîn Civîna Giştî ya Neteweyên Yekbûyî de ku ev çend roj in li New Yorka DYA pêk tê, nêrînên xwe anî ziman. Baybaşîn nerazîbûna xwe li hemberî rewşa Kurdan û bêdengiya navneteweyî anî ziman û daxwaza "Dewletên Yekbûyî yên Kurdistana Serbixwe" kir.

Baybaşîn di peyama xwe de bal kişand ser axaftina serokê Tirkiyeyê Erdogan, ku daxwaza naskirina Komara Tirk a Bakurê Qibrisê bi 80 hezar niştecihan dike. Baybaşîn destnîşan kir ku ev daxwaz li ser bingeha "serweriyeke fiîlî" ya Tirkiyeyê li wir e.

Baybaşîn rewşa Qibrisê bi rewşa Filistînê re dan ber hev û got: "Lê belê Filistîn xwediyê 2 mîlyon niştecihan e û gelek serokên cîhanê behsa pejirandina serwerî û serxwebûna wê dikin. Li Qibrisê jî, her çend ji aliyê dewletên cîhanê ve nehatiye naskirin, lê avahiyeke dewletê ya fiîlî heye. Li Filistînê jî avahiyeke dewletê heye ku di nav Neteweyên Yekbûyî de statuya çavdêriyê heye. Heta Filistîniyên ku di bin banê Îsraîlê de dijîn jî xwedî heman mafên qanûnî ne wekî Cihûyên Îsraîlî ne. Îsraîl xwediyê du zimanên fermî ye: Îbranî û Erebî. Erebî, wekî zimanê dayikê yê Filistîniyan, wekî zimanê fermî yê dewletê hatiye pejirandin. Bêguman nakokî û şer hene; lê di heman demê de danûstandin jî hene."

Lê belê Baybaşîn rewşa Kurdan bi rengekî cûda şirove kir: "Lê rewşa me Kurdan çi ye? Ne behsa navê me, ne zimanê me, heta tîpa 'K' ya di destpêka peyva 'Kurdîtî' de jî nayê kirin. Ew me tine dihesibînin, wekî baran bi me re tevdigerin. Ev ji bo me rewşeke şermezariyê ye."

Baybaşîn armanca daxwaza dewleteke serbixwe de, wiha anî ziman û got: "Dema em daxwaza Dewletên Yekbûyî yên Kurdistana Serbixwe dikin, armanca me ew e ku em ji vê rewşa şermezar xilas bibin. Bikaranîna mafê xweseriyê ya gelê me mafê herî xwezayî ye."

Baybaşîn her wiha hestên xwe yên li ser Civîna Giştî ya Neteweyên Yekbûyî parve kir: "Ez dema axaftinên di Neteweyên Yekbûyî de guhdarî dikim, xwe bi zehmet digirim; ez difikirim, ez nefret dikim. Ji ber ku ev rewşa ku em ketine tê de, bi rûmeta mirovahiyê re nagunce."

Di dawiya peyama xwe de, Baybaşîn bi tundî li dijî wan kesên ku dibêjin "Dewlet ji Kurdan re ne lazim e" derket: "Bila kesek dernekeve û nebêje 'Dewlet ji Kurdan re ne lazim e.' Em tu carî zorkeriyeke wiha qebûl nakin. Em ê piştrast bikin ku dewleta me ji aliyê gelê me ve bê rêvebirin. Em ê nîşanî her kesî bidin ku ev ne mijareke danûstandinê ye. Bi taybetî yên ku dibêjin 'Dewlet ji Kurdan re ne lazim e,' eşkere xayinên welat û neteweyê xwe ne. Di vê mijarê de ti gotineke din tune."