Kurdistan Navendeke Girîng a Enerjiyê

Rezervên gaza xwezayî an ku siruştî yên Herêma Kurdistanê, ku tê texmîn kirin 200 trîlyon m3 metirsêca ye û ji sedî 30 ê rezervên cîhanê pêk tînin, eleqeyeke stratejîk ji Washingtonê kişandiye. Pispor destnîşan dikin ku ev potansiyel ne tenê dikare hewcedariyên Iraqê dabîn bike, lê di heman demê de Kurdistanê bike navendeke girîng a enerjiyê.

Di paneleke ku li Washingtonê ji aliyê Înîsiyatîfa Cîhanî ya Kurdî ji bo Aştiyê ve hatibû organîzekirin de, girîngiya jeopolîtîk û aborî ya van rezervan hate destnîşankirin. Dr. Yerevan Saîd, rêvebirê Înîsiyatîfa Cîhanî ya Kurdî ji bo Aştiyê, diyar kir ku armanca çalakiyê ew bû ku balê bikişîne ser fersend û astengiyên li pêş Herêma Kurdistanê di veguherandina van çavkaniyan bo sermayeyeke stratejîk.

Potansiyela Herêmî û Navneteweyî

Raad Alkadîrî, lêkolînerekî ewlehiya enerjiyê, anî ziman ku gaza siruştî ya Herêma Kurdistanê dikare di dabînkirina Iraqê de û herwiha di bicihkirina welêt wek navendeke herêmî de roleke bingehîn bilîze. Wî destnîşan kir ku tevî ku Iraq di warê çavkaniyan de dewlemend e, piraniya potansiyela wê nehatiye bikaranîn, lê Kurdistan dikare daxwaziya navxweyî peyda bike û di dawiyê de bibe xaleke veguhestina sereke ji bo Ewropa û bazarên din.

Astengî û Êrîşên li ser Zeviyên Gazê

Lê belê, van fersendan bê astengî nebûne. Di sala 2023an de, gelek zeviyên gazê yên Herêma Kurdistanê ji aliyê milîsan ve bi roket û dronan hatin armanckirin, ku bi demkî planên berfirehkirinê asteng kirin, nemaze li zeviya Kormor. Tevî van êrîşan, karbidestên Amerîkî berdewam dikin ku sektora gazê wekî pêşîneyeke krîtîk binav bikin.

Noam Raydan, lêkolînerek li Konferansa Washingtonê ji bo Rojhilata Nêzîk, piştrast kir ku ev êrîş bandorê li leza berfirehkirinê dikin û astengiyên demdirêj diafirînin, lê nikarin hilberînê bi tevahî rawestînin.

Qonaxeke Girîng di Têkiliyên DYA-Kurdistanê de

Victoria Tyler, rêvebira Înîsiyatîfa Iraqê ya di Çarçoveya Bernameya Rojhilata Navîn de li Civaka Atlantîkê, bal kişand ser nêrîna stratejîk a Washingtonê. Wê diyar kir ku DYA gaza siruştî ya Herêma Kurdistanê wek fersendeke girîng ji bo tevlêbûna Amerîkayê dibîne. Ev yek di serdana dawî ya Serokwezîr Mesrûr Barzanî ya Washingtonê de bi zelalî hate dîtin, ku li wir peymanek di navbera Western Zagros û HKN Energy de bi hevrêziya Hikûmeta Herêma Kurdistanê hate îmzekirin.