Şanowa Li Ûrmiyê Konseran Lidar Dixe

Ûrmiye - Kurdistan: Koma muzîkê ya "Şanowa" ku ji 38 muzîkjênan pêk tê, ji bo pêşxistina muzîka resen, mêvandariya hunermendên Kurd kir û dê di dawiya havîna îsal de du konseran li Ûrmiyê li dar bixe.

Îhsan Ayînfer, serpereştê koma muzîkê ya "Şanowa", di hevpeyvînekê de bi KurdistanPress re, li ser destpêkirina koma Şanowa ku nêzîkî salek e, armanc û dîtinên vê komê şîrove kir û got: "Ev kom ji 38 hunermendan pêk tê, ku 31 ji wan tenbûrjen in, herwiha hunermendên bi amûrên perkusyon, bilûr, balaban û zirne jî ji bajarên cuda, di nav de Qûçan, mêvanên me ne. Armanca me ya sereke komkirina komeke mezin e ku tenbûr bibe eksen ji bo pêşkêşkirina muzîka resen a Kurdî."

Herwiha Ayînfer belavkirina çand û hunera Kurdî wekî yek ji mîsyonên din ên koma Şanowa destnîşan kir û anî ziman: "Yek ji armancên me yên girîng, teşwîqkirina ciwanan e ji bo fêrbûna muzîka resen a Kurdî; ji ber ku fêrbûna vê muzîkê, bi rastî fêrbûna wêjeyî û zimanê Kurdî jî tê hesibandin."

Serpereştê koma Şanowa, bi tekezî li ser girîngiya piştgiriya gel ji bo bernameyên çandî, got: "Piştgiriya gel, piştgiriya huner û çanda wan bi xwe ye. Hunermend wê demê dikare xebata xwe bidomîne ku bizane gel piştgirî dide çanda xwe. Dîtina salonê ku bi temaşevanan tije ye, mezintirîn motîvasyon e ji bo her hunermendekî ku tevî hemû pirsgirêk û kêmasiyan, li ser piyan e û xebata çandî dike."

Ayînfer di berdewamiya axaftina xwe de bal kişand ser bernameyên pêşerojê yên komê û got: "Di 30'ê Îlonê de, bi du beşan de, di saetên 19:00 û 21:30 de, em ê li hola Wehdet a Ûrmiyê derkevin ser dikê û em hêvî dikin ku bi serkeftina di performansa yekem de, em ê bikaribin li bajarên din jî konser li dar bixin. Konsera destpêkê ji bo me pir girîng e ji ber ku di bidestxistina piştgiriya gel de roleke sereke dilîze."

Îhsan Ayînfer di dawiyê de, bi baldarî li ser hewldanên endamên komê, anî ziman û got: "Nêzîkî heft meh in ku em bi awayekî berfireh li ser vê projeyê amadekarî û veberhênana madî û manewî dikin. Niha ku kar gihîştiye qonaxa pêkanînê, em hêvî dikin ku gel jî piştgirî bide vê xebata çandî."

Razîye Mehmûdpûr