Pêşmerge Heta Hetayê Her Pêşmerge ye

Stockholm - Swêd: Kek Hêdî Gomeyî, Pêşmergeyekî berê yê ji gundê Bekircuwa yê Silêmaniyê, tevî temenê xwe yê 82 salî, li Swêdê jiyana xwe ji bo parastin û pêşxistina çanda Kurdî terxan dike. Roja Înê, Nesrîn Rojkan, ji Yekîtiya Nivîskarên Kurd li Swêdê, dema serdana Pirtûkxaneya Kurdî kir, şahidî van kedên hêja yên Kek Hêdî kir.

Li gor agahiyên ku ji aliyê Yekîtiya Nivîskarên Kurd li Swêdê ve hatine belavkirin, Kek Hêdî Gomeyî di xortaniya xwe de karên curbecur kirine, lê her dem bi ruhê welatparêziyê, wekî Pêşmergeyekî welatê xwe parastiye. Piştî salên dirêj ên têkoşînê, Kek Hêdî di sala 1988an de koçî Swêdê kiriye.

Li Swêdê, Kek Hêdî Gomeyî dest ji çalakvaniya xwe bernedaye û bi taybetî jî di warê baweriya Zerdûştiyê de xebatên girîng kiriye. Niha, tevî temenê xwe yê pêşketî, ew rojane serdana Pirtûkxaneya Kurdî dike û di karûbarên wê de alîkariyê dike. Nesrîn Rojkan anî ziman ku dema ew îro li pirtûkxaneyê bûye, Kek Hêdî pirtûkan di kataloga komputerê de tomar dikiriye, ku ev jî dilsoziya wî ya ji bo xebatê destnîşan dike.

Nesrîn Rojkan ji bo hemû kedên Kek Hêdî Gomeyî spasdarîya xwe anî ziman û got: "Spas bo te û spas bo hemû kedên te Kek Hêdî.. Tu jî kedên te jî pîroz in."

Ev helwesta Kek Hêdî, mînakeke zelal e ji bo dilsoziya Pêşmergeyên kevnar a ji bo gel, ziman û çanda Kurdî, û destnîşan dike ku keda ji bo welat tu carî xilas nabe, bêyî ku temen û cih çi be bila bibe, Pêşmerge heta hetayê her Pêşmerge ye.

Rodiyê Xwedêdayev