Baran behsa nexweşiya bişaftinê li Bakurê Kurdistanê dike

Diyarbekir – Kurdistan: Nivîskar Bahoz Baran, ku bi xebatên xwe yên li ser dîrok û çanda Kurdî tê nasîn, amadehiya weşandina pirtûkeke nû ragihand ku ew şeş sal in li ser wê dixebite. Pirtûka nû, ku sernavê wê "Jiyaneka Berevajî, têbîniyên li ser jiyanekê" ye, dê li ser diyardeya "bişaftin, bindestî û metinkariyê, " (asimîlasyonê) raweste û li ser ramanên li pişt dîmenên vê nexweşiya civakî kûrtir bikole.

Baran di daxuyaniya xwe de tekezî li ser giranî û metirsî û xetereya bişaftinê kir û got: "Bişaftin nexweşîyeka dijwar e û roj bi roj li nav Kurdan belav dibe. Ku pêşî lê neyê girtin, dawîya vê nexweşîyê mirin e." Wî her wiha destnîşan kir ku ji bo mirov ji nexweşiyekê xilas bibe, divê pêşî wê nexweşiyê hîs bike, hay jê hebe û wê qebûl bike.

Nivîskar, bal kişand ser rewşa li Bakurê Kurdistanê û raman û fikarên xwe anî ziman: "Hed û hesabê bişaftina li Bakurê Kurdistanê nîne. Lê bi giştî haya Kurdan ji vê nexweşîyê tune ye. Li welatê wan nexweşîyeka dijwar heye, jîyana wan berevajî bûye, gelek kes bi vê nexweşîyê ketine, lê wekî ku ne nexweş bin dijîn." Ev dîtinên wî, girîngiya xebata wî ya nû zelaltir dike.

Pirtûka nû, ku weke xebateke temamker ji bo "Ferhenga Bişaftinê" ya berê tê hesibandin, dê kûrtir bikeve nav têkiliyên di navbera bişaftin, bindestî û mêtinkariyê de. Baran diyar kir ku di "Ferhenga Bişaftinê" de bêtir dîmenên bişaftinê hebûn, lê di xebata wî ya nû de armanc ew e ku "portreyeka bişaftin-bindestî-mêtinkarîyê" çêbike û ramanên bingehîn analîz bike.

Pirtûka bi navê "Jiyaneka Berevajî, têbîniyên li ser jiyanekê" ku ji nav Weşanên Wardozê derketiye, tê çaverêkirin ku ev xebata girîng di demeke nêzîk de ji bo xwendevanên Kurd û hemî kesên ku li ser mijarên civakî, çandî û neteweyî yên Kurdan lêkolînê dikin, bibe çavkaniyek hêja.