Robert Aderholt: Em peywendiyên xwe yên dostane bi Herêma Kurdistanê re bipêş dixin
Aderholt pêwendiyên di navbera Herêma Kurdistanê û welatê xwe de weke "gelekî girîng û pêwîst" binav kir û tekezî li ser pêşxistina van pêwendiyên "dostane" di hemû waran de, bi taybetî di warên siyasî û aborî de, kir.
Endamê Kongressa Amerîkayê Robert Aderholt pesnê girêbestên ku Hikûmeta Herêma Kurdistanê bi du kompanyayên welatê wî re di warê enerjiyê de îmze kirine, da û tekez kir, "ew li benda encamên pir baş in." Aderholt herwiha got: "Pêwendiyeke me ya dostane bi Hewlêrê re heye."
Komgressmanê Amerîkayê Robert Aderholt derbarê pêwendiyên Hewlêr û Washingtonê, girêbestên Hikûmeta Herêma Kurdistanê bi kompanyayên Amerîkî re û rewşa herêmê, daxuyaniyeke taybet da Berpirsê Ofîsa Kurdistan24 a li Washingtonê Rehîm Reşîdî.
Aderholt pêwendiyên di navbera Herêma Kurdistanê û welatê xwe de weke "gelekî girîng û pêwîst" binav kir û tekezî li ser pêşxistina van pêwendiyên "dostane" di hemû waran de, bi taybetî di warên siyasî û aborî de, kir.
Bi serpereştiya Serokwezîr Mesrûr Barzanî, roja 19ê Gulana 2025an di merasîmekê de, du peymanên di warê enerjiyê de di navbera Wezareta Samanên Siruştî ya Hikûmeta Herêma Kurdistanê û herdu kompanyayên Amerîkî yên petrolê (HKN Energy) û (Western Zagros) de hatin îmzekirin.
Kongresmen Aderholt van girêbestan weke "pir baş" binav kir û dubare kir ku ew li benda encamên pir baş ji van peymanên di navbera Hewlêr û Washingtonê de ne.
Derbarê pêwendiyên Amerîkayê bi welatên din ên cîhanê re, endamê kongressê ji berpirsê ofîsa Kurdistan24 re got: "Ji bo me gelekî girîng e ku li seranserê cîhanê dostên me hebin. Weke Amerîka, em hewl didin ku pêwendiyên xwe bi hemû aliyan re baştir bikin."
