Holanda: Festîvaleke mezin a çandî ya Kurdî û Holandî hat lidarxistin

Bi amadebûna berpirsê nivîsîngeha serpereştiya giştî ya Revenda Kurdistanî, Federasyona Ciwanan festîvaleke çandî ya Kurdî û Holandî hate li dar xistin, ku armanca wê danûstandina çandî û vejandina Şeva Yelda û kevneşopiyên Kurdewarî bû.

Roja 21ê Kanûna Yekem a 2025an, bi amadebûna Qehraman Osman, Berpirsê Nivîsîngeha Şîfa Barzanî, Şukrî Berwarî, Nûnerê Konfederasyonê, Yad Emîn, Serokê Federasyona Ciwanên Revenda Kurdistanî, li bajarê Osterhaus ê Holandayê, festîvaleke berfireh a çandî ya Kurdî û Holandî li dar xistin.

Armanca sereke ya festîvalê danasîna çand, huner û kevneşopiya resen a Kurdî bû û herwiha çêkirina pireke pêwendiyê di navbera her du çandên Kurdî û Holandî de, bi taybetî nîşandana dewlemendî û bedewiya çanda Kurdî.

Bernameyên Hunerî û Çandî

Festîval bi bernameyeke tije û curbecur dest pê kir, ku çendîn beşên hunerî tê de hebûn.

Vekirina festîvalê ji aliyê Malva, endama çalak a Federasyona Ciwanan ve hat kirin, herwiha pêşkêşkarên festîvalê, du stêrkên ser sehneya festîvalê (Queen, Roza) bernameyên xwe pêşkêş kirin.

Di beşa nîşandanê de, nîşandana cil û bergên Kurdî hat kirin, ku tê de sêwiran (Dizayn) û dirûtina cilên jinan ji aliyê Xatûn Roza Husên ve, ligel nîşandana cilên şahane ji bo mêran ji aliyê Lapan Goran û Jale ve hatibû amadekirin. Di warê muzîk û stranan de, çendîn kom û hunermend beşdar bûn, di nav de Orkêstraya Çandî û Koma Pop Kor Prestige. Herwiha komên govendê yên Kurdî (Zagros, Koma Roj, Koma Azadî) bi nîşandanên xwe yên neteweyî, coş û kelecaneke mezin dan amadevanan.

Herwiha semaya Mewlana û lêxistina defê ji aliyê Şilêr û Alan ve hat pêşkêşkirin.

Çendîn stranbêjên navdar wekî Karwan Heme Helaq, Çirîke, Deşnê Baban, Dilbirîn û Bavêl Serheng bi dengên xwe yên xweş beşdar bûn.

Herwiha kurtefilmek bi senaryo û derhêneriya Bavêl Serheng hat nîşandan.

Xwarina Kurdewarî û Pêşangeha Karên Destî

Li derveyî hola sereke, atmosferek taybet hatibû rêkxistin, ku şêwazekî bazarokek wergirtibû. Di wê beşê de cil û bergên Kurdî û berhemên nivîskaran dihatin nîşandan û firotin.

Bi boneya hevdemîya festîvalê bi Şeva Yelda yê re, maseyek taybet bi şêwazekî hunerî û karê destî ji aliyê xatûneke Kurd ve ji bo "Şevçira" hatibû xemilandin. Wekî beşek ji kevneşopiya mêvanheziya Kurdî, xwarin û vexwarineke taybet ji bo mêvanan hatibû amadekirin, ku biryanî, yapraxa pelgêmêwan, şorbeya nîskê û salate bû, ev jî wek sembolek ji bo danasîna çêj û sifra Kurdî ji mêvanên Holandî û biyanî re.

Gotar û Kesayetiyên Beşdar

Di beşeke din a merasîmê de, çendîn gotar hatin pêşkêşkirin. Gotara Şîfa Barzanî, Serpereştyarê Giştî ya Revenda Kurdistanî, ji aliyê Qehreman Osman, Berpirsê Nivîsîngeha navborî ve hat xwendin. Herwiha Şukrî Berwarî, gotara Konfederasyona Revenda Kurdistanî pêşkêş kir, Yad Emîn, Serokê Federasyona Ciwanan, gotara federasyona xwe xwend.

Di vê festîvalê de, çendîn kesayetiyên diyar ên siyasî, çandî û civakî amade bûn, di nav de Dilawer Ajgehî, Nûnerê Hikûmeta Herêma Kurdistanê û Mîran Ebraham, Serokê PENa Kurdî, Hermin Ehmed, Sernivîsera kovara Rewend, û çendîn kesayetiyên girîng ên diyasporaya Kurdistanî amade bûn.

Rêxistinên festîvalê spas û rêzdariya xwe ji Şîfa Barzanî û Desteya Rêveberiya Konfederasyona Revenda Kurdistanî re pêşkêş kirin ji bo piştgiriya wan a maddî û manewî, herwiha rola Xatûn Roza Husên wekî rêxistinker û Yad Emîn bi bilindî hate nirxandin.

Dawiya Festîvalê û Peyama Pêkvejiyanê

Dîmena dawiya festîvalê, girtina wêneyên bi komî yên mêvan û rêxistinkeran li ser derenceyên holê bû, ku bi alayên mezin ên Kurdistan û Holandayê hatibû xemilandin.

Ev dîmen îfadeya ruhê neteweyî û pêkvejiyana aştiyane ya Kurdan li Ewropayê dikir û peyama dostanî û mirovheziya Kurdî gihand dostên Holandî.

Hêjayî bi bîranînê ye, du wênegirên dilxwaz, ku wekî xwebexş û dilxwaz sponsorên wênegiriya festîvalê bûn, ku ew jî ji Tango Resûl û Ehmed Silêvanî pêkhatibûn.