Bila Gel Biryara Çarenûsa Xwe Bide, Ne Hûn!

Hewlêr - Kurdistan: Nivîskarê Kurd, Serkaw Hadî Ayzê di vîdeoyeke tund de ku li ser medyaya civakî belav bûye, bangewaziyeke zelal û rasterast li rêber û partiyên siyasî yên Kurd dike, da ku ew dest ji axaftina li ser navê gel berdin û destûrê bidin neteweya Kurd ku bi rêya referandûmeke azad û dadperwer biryara çarenûsa xwe bide. Çalakvan rexneyên giran li wan kesên ku mafê çarenûsa neteweyî înkar dikin, tîne û wan bi hevkarîya bi dijminên dîrokî re tawanbar dike.

Rêberên Kurd Mafê Çarenûsê Înkar Dikin

Serkaw Hadî Ayzê Nivîskarê Kurd ku di vîdeoyê de xuya dike, diyar dike ku li ser mijarên bingehîn ên wekî serxwebûn, federalîzm, an jî otonomiyê, tu serokek, tu partiyek mafê wê nîne ku li ser navê tevahiya neteweya Kurd biryarê bide. Ew balê dikişîne ser îroniyê ku, dema welatên din ên wekî Sûdana Başûr, Fîlîstîn an Kosovoyê bi piştgiriya navneteweyî ber bi serxwebûnê ve diçin, hinek ji rêberên Kurd ji bo wan gelan serxwebûnê dixwazin û piştgiriya wan dikin, lê belê ew bi xwe vê mafê ji gelê xwe re red dikin û dibêjin dema dewletbûnê nemaye. Ew dibêje: "Tu mafê te nîne ku tu bibêjî em Sûrî ne an em ê li Sûriyeyê bimînin. Divê tu li ser xwe biaxivî, lê ne li ser navê neteweya Kurd,"

Dîroka Xayinî û Hevkariyê

Serkaw Hadî Ayzê behsa dîroka têkçûyî ya hin rêberên Kurd dike û wan bi karanîna gotinên dijminên dîrokî tawanbar dike. Wek mînak, ew bi bîr dixe ku Qasimlo, rêberê dîrokî yê Kurdên Rojhilat, gotibû "Em hemû Îranî ne," û Celal Talabanî jî gotibû "Dewleteke Kurdî xewna helbestvanan e." Nivîskarê Kurd van gotinan wek heqaret û xiyanet li neteweya Kurd dibîne, ji ber ku ev gotin hêviyên gelê Kurd ên ji bo serxwebûnê tune dikin.

Ew herwiha rexneyên tûj li ser tevgerên hin partiyên Kurdî yên ku bi dewletên herêmî re, wekî Tirkiye, Îran, Sûriye û Iraqê, re hevkariyê dikin, tîne. Ew destnîşan dike ku ev hevkariyên hanê ne tenê zirarê didin berjewendiyên neteweyî, lê di heman demê de rê li ber destwerdanên leşkerî yên derve jî vedikin. Wî bi tundî amaje bi rewşa Şingal û Kerkûkê kir, ku li wan deran hêzên Pêşmergeyan (PKK, YNK, û Demokrat jî di nav de) ji aliyê hêzên dijmin ve hatin derxistin an jî hatin dorpêçkirin. Nivîskar bi tundî diyar dike ku "Wek serokê partiyek, tu mafê te nîne ku tu bibêjî Kurd serxwebûnê dixwazin. Her wiha mafê tu Serokek nîne bibêje em dixwazin Tirkiyê re bin an Irak, Îran û Suriyê re bin. Ev heqareteke mezin e bi neteweya Kurd,"

Stratejiyên Dijmin û Rola Metirsîdar a PKK

Nivîskar stratejiyên dewletên herêmî yên li dijî Kurdan eşkere dike. Ew diyar dike ku Tirkiye, mînakî, hebûna milîsên PKK'ê wek hincet bikar tîne da ku li dijî hemû Kurdan şer bike û pêşketinên Kurdan ên ji bo xweseriyê an serxwebûnê asteng bike. Ew dibêje: "Pêwîstiya Tirkiyeyê bi milîsên PKK'ê heye, da ku li dijî Rojavayê Kurdistanê û Başûr şer bike," Ew bi tundî PKK rexne dike û dibêje: PKK dijî serxwebûna Kurdistanê tevdigere û dibêje dema serxwebûn û dewletbûnê nemaye, lê belê heman PKK piştgiriya serxwebûna Filistînê dike û ji gelê Filistînê re dewlet dixwaze. Ev helwesta wan dû rûyî ye û dijminayetî kirina gelê Kurdistanê ye. Herwiha ewên ku dixwazin Tirkiyeyê wekî dewleteke "bedew û xweşik" û dewleteke Tirkî ya "demokratîk" nîşan bidin bi tundî rexne dike.

Banga ji bo Referandûmê û Rêzgirtina Îradeya Gel

Di dawiya vîdeoya xwe de, çalakvan bi israr bang li hemû gelê Kurd dike ku li ser mafê xwe yê çarenûsê xwedî derkevin. Ew daxwaz dike ku bi lezgînî li her çar parçeyên Kurdistanê referandûm bê lidarxistin û gel bixwe biryara xwe ya dawîn bide. Nivîskar dibêje: "Helwesta Serok Mesûd Barzanî ya di referandumê de wekî rêzgirtina deng û raya gel bû. Ji ber ku Barzanî got em ê referandum bikin û raya gel bipirsin gel çi bixwaze ew e. Ev e nîşan da ku Xebata te ew e ku tu li şûna neteweyê biryarê nedî. Xebata te ew e ku tu mafê neteweyê bigrî, rêza neteweyê bigrî, û referandûmê bikî." Ew bi bîr dixe ku demokrasî ew e ku tu kesek mafê wî nîne ku li ser navê netewekê biryarê bide, û ev maf tenê û tenê yê gelê Kurd e.

Ev vîdeo nîşana hêrs û bêhêvîtiya beşekî mezin ji gelê Kurd e, ku dixwazin rêberên wan li şûna berjewendiyên partîtî an kesane, berjewendiyên neteweyî bidin pêş û rê bidin gel ku bi azadî biryara paşeroja xwe bide.