Hewldanek Ji Bo Hevparîbûna Ji Mafên Zimanê Kurdî
Bangawaziyeke Dîrokî ji bo Hevparîbûna di Mafên Zimanê Kurdî de: Bang li Hemû Aliyan Tê Kirin
Stenbol – (25’ê Cotmeha 2025) – Rêxistinên Kurd KÜRT-KAV û HEZKURD, bi piştgiriya gelek komele, weqf, nivîskar, hunermend û mamosteyan, bangawaziyeke hevpar a dîrokî ji bo mafên zimanê Kurdî kirin. Ev bangawazî, ku banga yekîtiyê di berxwedana zimanî de dike, dê di 25’ê Cotmeha 2025’an, roja Înê, saet 14.00’an de li Stenbolê, li navenda KÜRT-KAV’ê ya li Tarlabaşı Bulvarı, Çorbacı Sokak No:13, Taksim, Beyoğlu were pêşkêşkirin.
Di vê bangawaziyê de, bang li hemû kesên ku dixwazin bibin "Deng û Awaza Kurdî" tê kirin ku beşdarî vê pêngava girîng bibin. Di nava kes û saziyên ku banga beşdarbûnê ji wan re hatiye kirin de, Komeleyên Zimanê Kurdî, Weqf û Platformên Kurdî, Televîzyon û Weşanxaneyên Ziman, Enstîtuyên Ziman, Navendên Akademîk, Hunermend û Dengbêj, Nivîskar, Mamoste û Xwendekarên Kurdî, Aktîvîstên Maf û Çandê, Navendên Partiyên Siyasî, Rêxistinên Civakî, Parastvanên Mafên Mirovan, Komeleyên Herêmî û Rojnamevan û Medyaya Kurdî hene.
Suphi Özgen, di daxuyaniya xwe ya derbarê bangawaziyê de, destnîşan kir ku ev bangawazî ne tenê ji bo kes û saziyên ku di banga nivîskî de hatine zêdekirin e, lê "bangeke vekirî" ye ji bo tevahiya gel. Özgen, armancên bangawaziyê wiha anî ziman: "Em bang li hemû gelê xwe dikin ku mafê dersên Kurdî yên li dibistanên navîn hene, bi bandor bikar bînin. Her wiha, em daxwaz dikin ku mafên din ên zimanî yên ku formûlasyona wan a hiqûqî hîna nehatiye çêkirin, bi fermî bêne naskirin û Kurdî bibe zimanekî fermî, da ku wekheviya rastîn were misogerkirin."
Suphi Özgen, peyama yekîtiyê jî dubare kir û got, "Cudahiyên me normal in, lê em tev bi hev re di mafên zimanê Kurdî de bibin hevpar." Özgen diyar kir ku ev daxwaz û bangawazî bi rêzdarî ji raya giştî re tê ragihandin.
Ev pêngava hevpar, hêvî dike ku zimanê Kurdî di hemû qadên jiyanê de bibe xwedî statuyeke fermî û bi vî awayî ziman û çanda Kurdî bi awayekî azad û wekhev pêş bikeve.
