نرخی نەوتی برێنت بۆ کەمتر لە 67 دۆلار دابەزی

نرخی نەوتی برێنتی دەریای باکوور 16 سەنت دابەزی و بە 66 دۆلار و 58 سەنت مامەڵەی پێوەکرا. نرخی نەوتی سووکی تەکساسی ئەمریکاش 20 سەنت دابەزی و بە 64 دۆلار و 91 سەنت مامەڵەی پێوەکرا.

دانییەل هاینێس، شرۆڤەکاری سەر بە بانکی ئۆسترالی نیوزلاندی لەو بارەیەوە رایگەیاند، "بازاڕی نەوت ئێستا نیگەرانی ئەوەیە گرووپی ئۆپێک پڵەس خستنەڕووی نەوت هێشتا زیاتر بکات."

چوار سەرچاوەی ئۆپێک پڵەس ئاماژەیان بەوە داوە لە کۆبوونەوەی داهاتووی ئەو گرووپە ئەگەری ئەوە هەیە بڕیار بدرێت بۆ مانگی هەشتی ئەم ساڵ رۆژانە 411 هەزار بەرمیل نەوتی دیکە زیاد بکرێت. لەلایەکی دیکەوە، ئەگەری سستبوونەوەی ئابووریی جیهان بەهۆی پێناسە گومرکییەکانی ئەمریکا گوشاری بۆ نرخەکانی نەوت دروستکردووە.

سکۆت بیسێت، وەزیری گەنجینەی ئەمریکا رایگەیاند، "سەرەڕای دانوستاندن لەگەڵ وڵاتان، ئەگەری هەیە ئەو وڵاتانە لەناکاو ئاگاداربکرێنەوە لەسەر زیادکردنی پێناسە گومرکییەکان."

 رۆژی 9 ی ئەم مانگە دوا دەرفەتە بۆ وڵاتان بۆ ئەوەی لەگەڵ ئەمریکا لەسەر پێناسە گومرکییەکان رێکبکەون. سەرۆکی ئەمریکا، بەرزکردنەوەی پێناسە گومرکییەکانی سەر وڵاتانی هەڵپەساردبوو بۆ ئەوەی دەرفەتی دانوستاندن بەو وڵاتانە بدات کە هێشتا لەگەڵیان رێکنەکەوتوون.

 بانکی مۆرگن ستانلی، پێشبینیکردووە نرخی نەوتی برێنت سەرەتای ساڵی داهاتوو دادەبەزێت بۆ نزیکەی 60 دۆلار لەبەر ئەوەی نەوتی زۆر لە بازاڕدا هەیە و مەترسییە جیۆسیاسییەکانی رۆژهەڵاتی نێوەڕاست کەمبوونەتەوە.

سەرچاوە: ڕووداو