ویلایەتێکی ئەمریکا مادەیەکی شێرپەنجەیی لە بەرهەمە جوانکارییەکاندا قەدەخە دەکات
ویلایەتی واشنتن، وەک یەکەم ویلایەت لە ئەمریکا، بڕیاری قەدەخەکردنی ئەو مادە کیمیاییانەی دەرکرد کە فۆرماڵدیهاید لە پێکهاتەکانیاندا هەیە وەکو وەک کرێمی پێست، جێڵی قژ و چەسپی برژانگ، بڕیارەکەش لە ساڵی 2027ـەوە جێبەجێ دەکرێت.
ئەم هەنگاوە بەپێی یاسای "پێکهاتە جوانکارییە بێ ژەهرەکان (Toxic-Free Cosmetics Act) دێت، کە ئامانج لێی پاراستنی تەندروستیی بەکارهێنەرانە.
د.. ئامی زۆتا، پسپۆڕی تەندروستی گشتیی لە زانکۆ کۆڵەمبیان لە ئەمریکا دەڵێت، "فۆرماڵدیهاید وەک مادەیەکی شێرپەنجە ناسراوە و پەیوەندی بە شێرپەنجەی خوێن، قورگ و لووتەوە هەیە، هەروەها دەکرێت ببێتە هۆی تەنگەنەفەسی و هەستیاریی پێست."
بەپێی یاسا نوێیەکە، لە 1ی کانوونی دووەمی 2027ـەوە، دروستکردن و فرۆشتنی ئەو بەرهەمانەی ئەو مادانەیان تێدایە قەدەخە دەکرێت، فرۆشیارەکانیش تاوەکو کۆتایی ساڵی 2027 مۆڵەتیان هەیە بۆ کشانەوەی ئەو بەرهەمەنەی لە بازاڕەکاندان.
فۆرماڵدیهاید مادەیەکی پارێزەرە و بۆ درێژکردنەوەی تەمەنی بەرهەمەکانی وەک کرێمی پێست، جێڵی قژ و چەسپی برژانگ بەکاردەهێنرێت.
سەرچاوە: ڕووداو
