عێراق و ئێران ڕێککەوتن
وەزیری نەوتی عێراق درێژکردنەوەی ڕێککەوتنی نەوتیی لەگەڵ تورکیا ڕاگەیاند و ئاماژەی بە هەوڵەکان کرد بۆ گەیشتن بە لێکتێگەیشتن لەگەڵ ئێران سەبارەت بە تێپەڕبوونی نەوت لە گەرووی هورمز.
ئەمڕۆ دووشەممە، 3ـی 8ـی 2026، باسم محەمەد خزەیر، وەزیری نەوتی عێراق لە لێدوانێکدا بۆ ئاژانسی هەواڵی عێراقی بڵاویکردەوە،، لە ١ی ئابدا ڕێککەوتنێکی گرنگ لەگەڵ لایەنی تورکیا واژۆ کراوە و لێکتێگەیشتنە نەوتییەکان بۆ ماوەی ساڵێک درێژ کراونەتەوە.
ئاماژەی بەوەش کردووە،، لەم ماوەیەدا ڕەشنووسی ڕێککەوتنێکی چوارچێوەیی درێژخایەن ئامادە دەکرێت کە ئامانجەکەی دەستەبەرکردنی بەردەوامیی هەناردەکردنی نەوتی خاوە لە کێڵگەکانی هەرێمی کوردستانەوە.
لە لایەکی ترەوە، وەزیری نەوت بڵاویکردەوە،، پلانێکی گەورە هەیە بۆ گواستنەوەی نەوتی بەشێک لە کێڵگەکانی باشوور لە ڕێگەی بۆرییەوە تاوەکو بڕی هەناردەکردن بگاتە ٧٠٠ هەزار بەرمیلی ڕۆژانە.
لە کۆتاییدا ئاماژەی بەوە کرد،، شاندی عێراق لە وتووێژەکانی لەگەڵ ئێران باسی لە هەناردەکردنی نەوت لە ڕێگەی گەرووی هورمزەوە کردووە و پێشبینی دەکەن لە ڕۆژانی داهاتوودا بگەنە لێکتێگەیشتنێک کە بەشدار بێت لە پاراستن و ئاسانکاریی تێپەڕبوونی تانکەرە نەوتییەکان.
