10-11-2025 وەزارەتی بازرگانیی عێراق رایگەیاند، ئەپڵیکەیشنی فۆڕمی خۆراک بۆ ماوەی 10 رۆژ کارا دەکەنەوە بۆ ئەو خێزانانەی لە قۆناخی سەرەتادا ناویان تۆمار نەکردووە و بەشەخۆراکی مانگانەیان بڕدراوە.
ئاراس محەممەد، بەڕێوەبەری رێکخستنی پسووڵەی خۆراک لە سلێمانی، ئەمڕۆ یەکشەممە گوتی: "جگە لەوانەی خۆیان بە ئۆنلاین فۆڕمەکە پڕدەکەنەوە، رۆژانە خەڵکێکی زۆر سەردانمان دەکەن بۆ ئەوەی خۆیان تۆمار بکەن".
بەگوێرەی بەڕێوەبەرایەتیی گشتیی بازرگانی و پیشەسازیی هەرێمی کوردستان بۆ رووداو، "87%ی هاونیشتمانییان لە قۆناخی یەکەمدا خۆیان لە پسووڵەی ئەلیکترۆنیی خۆراک تۆمارکردووە، بەڵام بەهۆی تۆمارنەکردنەوە نزیکەی 699 هەزار و 400 خێزان ماوەی دوو مانگە بەشە خۆراکی مانگانەیان بڕدراوە".
بەڕێوەبەری پسووڵەی خۆراک لە سلێمانی داوای لە هاونیشتمانییان کرد: "تاوەکو پێنجشەممە، 20ـی ئەم مانگە خۆیان تۆمار بکەن، چونکە دوایین رۆژە و بەپێچەوانەوە لە داهاتوودا تۆمارکردنی بێ بەرامبەر نامێنێت."
سیامەند قادر نانەکەلی، بەڕێوەبەری پسووڵەی خۆراک لە هەولێر، ئەمڕۆ بە تۆڕی میدیایی رووداوی راگەیاند، "پێنجشەممە دواڕۆژە و هەرکەس خۆی تۆمار نەکات بەشەخۆراکی بۆ ناگەڕێتەوە".
لە 05-03-2023ـەوە گواستنەوەی فۆڕمی خۆراک و زیادکردنی ناوی منداڵ بۆ فۆڕمی خۆراک لە تەواوی هەرێمی کوردستان راگیراوە. هەرچەند فۆڕمی خۆراک کرایە ئەلیکترۆنی و بڕیار بوو کۆتایی ئەم مانگە دەستپێبکاتەوە، بەڵام تاوەکو ئەمڕۆ پرۆسەکە راگیراوە.
بەڕێوەبەری پسووڵەی خۆراک لە هەولێر گوتی: "کردنەوەی خزمەتگوزاری بۆ زیادکردنی ناوی منداڵ و گواستنەوەی فۆرمی خۆراک، دەکەوێتە ساڵی نوێوە".
2ـی حوزەیرانی 2025، پڕکردنەوەی فۆرمی ئەلیکترۆنیی خۆراک دەستیپێکرد و 02ـی ئەیلوولی هەمان ساڵ داخرا.
پێش گۆڕینی فۆڕمی خۆراک بۆ ئەلیکترۆنی، لە 5 ملیۆن و 386 هەزار و 51 هاونیشتمانی لە هەرێمی کوردستان بەشەخۆراکی مانگانەیان وەردەگرت.