خێزانێکی هەڵەبجەیی دوای 29 ساڵ بەیەک شادبوونەوە

دوای 29 ساڵ لە یەکدی نەبینین، بەرەبەیانی رۆژی شەممە 24ی ئایار ئەبوبەکر و محەممەد، ئەو دووبرایەی لەگەڵ دایک و خوشک و برایەکی دیکەیان ئاوارەی ئەمریکا بوون، گەرانەوە باوەشی نیشتیمان؛ کە تۆپ و ناپاڵم و کیمیایی چارەنووسیانی لە هەڵەبجەوە بۆ ئەمریکا بردبوو.

 ئەبوبەکر محەممەدئەمین، هاونیشتمانیی هەڵەبجەیی دەڵێت، "رۆشتم گەنج بووین، ئێستا ئەوان سەریان سپی بووە و منیش پیر بووم، من زگورت بووم رۆشتم، ئێستا هاتوومەتەوە و سێ منداڵم هەیە. دەمەوێت کاتەکانم هەمووی لە هەڵەبجە بەسەرببەرم، هەڵەبجە هەموو دنیایە بۆ من."

خێزانە هەڵەبجەییەکە بەهۆی کیمیابارانەوە 11 ساڵ ئاوارەی وڵاتی پاکستان دەبن، لەوێوە چارەنووس بۆ دوو وڵاتی جیاوازیان دەبات، دووبرا گەڕانەوە بۆ هەڵەبجە و ئەوانی دیکەش بۆ ئەمریکا. مام عومەری برا گەورە، سەر و ریشی لە چاوەڕوانیدا سپی کردووە، فرمێسک بۆ ئەو رۆژ و ساڵانە دەڕێژێت کە لە دووریی دایک و برا و خوشکەکەی بەسەریبردووە، قەدەر رێگەی نەداوە دایکی و عوسمانی برای ببینێت، چونکە هەردووکیان لە غەریبیی ئەمریکا کۆچی دواییان کردووە.

عومەر محەممەدئەمین، برای ئەبوبەکر دەڵێت، "چیرۆکێکی قورسە باسکردنی، چونکە خێزانێک بووین پارچەپارچە بووین، باوک لە ئێران بەخاکسپێردراوە، برا و دایکم لە ئەمریکا و منیش لێرە بە تەنیا ماوم، ژیانی وا قورس لە چیرۆکی هەڵەبجەییەکاندا هەیە." ئەو خێزانەی هەڵەبجە دایک، باوک، 5 برا و خوشکێک بوون، لە کیمیاباران باوکیان شەهید دەبێت و دایک و برایەکی دیکەیان بریندار دەبن.

 دوای ئاوارەیی و نەداریی زۆر، عومەر و مەحموود بۆ کوردستان دەگەڕێنەوە، سێ برا و دایک و خوشکێکیان دەچنە ئەمریکا، دوای 37 ساڵ ئەو خێزانەی بە گەنجی لەیەک دوورکەوتنەوە بە پیری لەسەر یەک سفرە کۆبوونەوە، بەڵام لە دووریی سێ ئەندامی خێزانەکەیان.

سەرچاوە: ڕووداو