بۆ سێیەمجار وێستگەکانی دەنگدان لە عێراق و هەرێمی کوردستان تاقیدەکرێنەوە
رۆژی یەکشەممەی داهاتوو بۆ سێیەمجار وێستگەکانی دەنگدانی هەڵبژاردنی پەرلەمان لە عێراق و هەرێمی کوردستان تاقیدەکرێنەوە.
عیماد جەمیل، سەرۆکی تیمی میدیایی کۆمیسیۆنی باڵای سەربەخۆی هەڵبژاردنەکانی عێراق، ئەمڕۆ چوارشەممە 27ی ئابی 2025 بە تۆڕی میدیایی رووداوی راگەیاند، رۆژی یەکشەممەی داهاتوو 31ی مانگ، کاژێر 10:00ی بەیانی تاقیکردنەوەکە دەکرێت.
رۆژی 10ی ئەم مانگە، یەکەم تاقیکردنەوەی وێستگەکانی دەنگدان لە 1079 وێستگەی دەنگدان لە عێراق و هەرێمی کوردستان کرا. دووەمین تاقیکردنەوەش رۆژی 21ی ئەم مانگە بوو لە 1120 وێستگەی دەنگدان، کە 1100یان وێستگەی دەنگدانی گشتی بوون.
بڕیارە هەڵبژاردنی پەرلەمانی عێراق لە 11ـی تشرینی دووەمی ئەم ساڵ بکرێت.
پەرلەمانی عێراق لە 329 کورسی پێکدێت کە 320یان گشتی و 9ی دیکە کۆتان.
لە عێراق نزیکەی 29 ملیۆن کەس مافی دەنگدانیان هەیە، زیاتر لە 21 ملیۆن کەس کارتی بایۆمەتری دەنگدانیان هەیە و دەتوانن دەنگ بدەن.
ڕووداو
