دانپێدانانی عەجاج: لە 10 مانگ دا یەک لەسەر سێی زیندانییانی نوگرەسەلمان گیانیان لەدەستدا
عەجاج، کە بە جەلادەکەی بەندیخانەی نوگرەسەلمان ناسراوە، دانی بە تاوانەکانیدا ناوە و دەڵێت، رۆژانە بە بەرنامە زیندانییەکانیان برسی کردووە و دەستدرێژیی سێکسیی کردووەتە سەریان؛ ئاشکراشی دەکات کە تەنیا لە ماوەی 10 مانگ دا یەک لەسەر سێی زیندانییەکان گیانیان لەدەستداوە.
عەجاج لە لێدوانێکدا بۆ رۆژنامەی "سەباح"ی زمانحاڵی حکومەتی عێراق، نکۆڵیی لە بەرپرسیارێتیی ئەو تۆمەتانە نەکردووە، کە رووبەڕووی کراونەتەوە، بەڵکو دانی بەوەدا ناوە کە "بە بەرنامە رۆژانە هەڵمەتی برسیکردن و دەستدرێژیکردنە سەر زیندانییەکانیان وەکو ئامرازێکی کوشتنی بەکۆمەڵ هەبووە."
عەجاج باس لەوە دەکات کاتێک ئیدارەی بەندیخانەی نوگرەسەلمانی وەرگرتووە، 400 زیندانیی عەرەبی تێدابووە؛ ئەوانیان گواستووەتەوە و لە شوێنیان 3000 زیندانیی کوردی خەڵکی پارێزگاکانی سلێمانی و هەولێریان هێناوەتە بەندیخانەکە.
عەجاج دانی بەوەشدا ناوە کە "برسیکردنیان وەکو چەکێکی جەنگیی وێرانکەر بەکارهێناوە، کە لە بۆردوومانی سەربازی کەمتر نەبووە و تەنیا لە ماوەی 10 مانگ دا یەک لەسەر سێی زیندانییەکان گیانیان لەدەستداوە."
عەجاج ئەحمەد حەردان عوبێدی، لە پارێزگای سەڵاحەدین لەدایکبووە و دەرچووی خولی 7ـی کۆلێژی ئاسایشی نیشتمانییە. لە بەڕێوەبەرایەتیی ئەمنیی هەولێر، رومێسە، نەجمی، بسیە و موسەننا کاری کردووە، تاوەکو بووەتە سەرپەرشتیاری گشتیی بەندیخانەی نوگرەسەلمان. لەگەڵ زیندانییەکان زۆر دڵڕەق بووە، بۆیە زیندانییەکان ناسناوی "حەجاج"یان لێناوە، وەکو ئاماژەیەک بۆ تووندوتیژی و دڵڕەقییەکەی.
رۆژی پێنجشەممە، 31-07-2025، نووسینگەی شاناز ئیبراهیم ئەحمەد، خانمی یەکەمی عێراق رایگەیاند، "تاوانبارێکی شاڵاوەکانی ئەنفال بە ناوی عەجاج ئەحمەد حەردان دەستگیرکراوە."
نووسینگەی شاناز ئیبراهیم ئەحمەد داوا لە زیندانییان و کەسوکاری زیندانییان و بێسەروشوێنبووان دەکات، پەیوەندییان پێوە بکەن بۆ تۆمارکردنی سکاڵا دژی ئەو "تاوانبارە".
دواتر هۆزی عوبێد رۆژی یەکشەممە، 03-08-2025، روونکردنەوەیەکیان لەبارەی دەستگیرکردنی ئەو کەسە بڵاوکردەوە و رایانگەیاند، ئەو کەسەی دەستگیرکراوە عەجاجەکەی نوگرەسەلمان نییە و کەسێکی بێتاوانە.
هەمان رۆژ، یەکشەممە 03-08-2025، ئەرشەد حاکم، گوتەبێژی دەزگای ئاسایشی نیشتمانیی عێراق بە تۆڕی میدیایی رووداوی راگەیاند، ئەو کەسەی دەستگیرکراوە، ناوی عەجاج ئەحمەد حەردانە و بە حەجاجی نوگرەسەلمان ناسراوە و ئێستا لەلایەن دەزگاکەیانەوە لێکۆڵینەوەی لەگەڵدا دەکرێت.
ئەرشەد حاکم گوتی: "ئەو کەسە لە لێکۆڵینەوەکاندا زۆر بەخێرایی دانی بە تاوانەکانیدا ناوە، بەتایبەتی ئەو تاوانانەی دژی کوردی کردوون." هەروەها گوتی: "پرۆسەی لێکۆڵینەوە لەگەڵیدا لە قۆناخەکانی کۆتاییدایە."
عەبدولکەریم عەبد فازڵ (ئەبو عەلی بەسری)، سەرۆکی دەزگای ئاسایشی نیشتمانی، پشتڕاستی کردەوە کە دەستگیرکردنی عەجاج دوای لێکۆڵینەوەیەکی ورد و دانپێدانانی ئەفسەرانی پێشووی رژێمی بەعس بووە، کە ئاشکرایان کردووە عەجاج رۆڵی سەرەکیی لە تاوانەکانی کۆمەڵکوژی و راگواستنی زۆرەملێدا هەبووە.
سەرچاوە: ڕووداو
