ئەردۆغان بۆ ماکرۆن: ناکۆکییەکانی نێوان ئیسرائیل و فەلەستین کۆتایی بێت
سەرۆککۆماری تورکیا و سەرۆکی فەرەنسا لە پەیوەندییەکی تەلەفۆنیدا دۆخی غەززە و پێشهاتەکانی ناوچەکەیان تاوتوێ کرد.
فەرمانگەی پەیوەندییەکانی سەرۆککۆماری تورکیا، ئەمڕۆ یەکشەممە 27ـی تەمموزی 2025 لە راگەیێندراوێکدا ئاماژەی بەوەدا، رەجەب تەیب ئەردۆغان، سەرۆککۆماری تورکیا و ئیمانوێل ماکرۆن، سەرۆکی فەرەنسا بە تەلەفۆن قسەیان کرد.
لە پەیوەندییە تەلەفۆنییەکەی ئەردۆغان و ماکرۆن دا، دوایین دۆخی غەززە و پێشهاتەکانی ناوچەکە تاوتوێ کراون.
ئەردۆغان بە ماکرۆنی رایگەیاندووە، دۆخی مرۆیی لە غەززە خراپتر بووە و پێویستە کۆمەڵگەی نێودەوڵەتی بۆ چارەسەرێکی بەپەلە دەستبەجێ بکەوێتەخۆ.
ئاماژەی بەوەشداوە، پێویستە ناکۆکییەکانی نێوان ئیسرائیل و فەڵەستین کۆتاییان بێت. جەختی لەوە کردووەتەوە بۆ ئاشتییەکی هەمیشەیی لە ناوچەکەدا، چارەسەری دوو دەوڵەتی مەرجە.
ئەردۆغان هەروەها بەهۆی بڕیاری دانپێدانان بە فەڵەستین وەکو دەوڵەت، پیرۆزبایی لە ماکرۆن کردووە.
سەرچاوە: ڕووداو
