زاخۆ وەرزێکی نموونەیی هەبوو و ئەمڕۆ دوایین یاریی دەکات

ئەمڕۆ ئێوارە لە دوایین یارییدا لەم وەرزەی خولەکەدا و لە دەستپێکی رکابەرییەکانی گەڕی 38ـی خولەکەدا، یانەی زاخۆ بە ئارامییەکی زۆرەوە دەبێتە میوانی یانەی گەرمە و دەیەوێت بە ئەنجامێکی باشەوە کۆتایی بە رکابەرییەکانی وەرزێکی دوور و درێژ و ماندووکەری خولی ئەستێرەکانی عێراق بهێنێت.

زاخۆ لەم وەرزەی خولی عێراقدا، تیپێکی نموونەیی و بەهێز بوو، یانەکە لە 37 گەڕی رابردوودا 20 سەرکەوتنی بەدەستهێناوە، لە 10 یارییدا یەکسانبووە و 7 یاریی دۆڕاندووە، زاخۆ خاوەنی دووەم بەهێزترین هێڵی هێرشبەر بووە و 57 گۆڵی تۆمارکردووە، خاوەنی دووەم بەهێزترین هێڵی بەرگری بووە 25 گۆڵی لێکراوە، هەردووکیان لە دوای یانەی شورتە بووە.

جگە لەوەش لەو کاتەوەی عەبدولغەنی شەهد بووەتە راهێنەری یانەکە، زاخۆ هیچ یارییەکی نەدۆڕاندووە، لەو 8 یارییەدا یانەکە 7 کلین شیتی هەبووە و تەنیا یەک گۆڵی لێکراوە. زاخۆ بۆ یەکەمجار لەم وەرزەدا بلیتێکی دەرەوەی عێراقی مسۆگەرکردووە و بەشداری لە پاڵەوانێتییەکی دەرەوەدا دەکات.

سەرچاوە: ڕووداو