ئاگرێک لە سلێمانی کەوتووەتەوە، گومان دەکرێت درۆن کەوتبێتەخوارەوە

عەقید سەلام عەبدولخالق، گوتەبێژی دەزگای ئاسایشی هەرێمی کوردستان (سلێمانی) بە تۆڕی میدیایی رووداوی گوت: "ئاگرێک لە سنووری گوندی سوورگا کەوتوەتەوە و بووە بە هۆکاری سووتانی پووش و پاوانی ناوچەکە".

 ئاسایشی سلێمانی لە راگەیێندراوێکدا بەبێ ئەوەی رەتی بکاتەوە درۆن کەوتبێتە خوارەوە یان نا، ئاماژەی بەوەکردووە: "پاش بەدواداچوون و لێکۆڵینەوەکان، دەرکەوت کە ئاگرکەوتنەوەیەک بوەتە هۆکاری سوتانی پووش و پاوان".

بەرپرسێک لە ئاسایشی سلێمانی رەتی کردەوە کەوتنەوەی ئاگرەکە بەهۆی درۆنەوە بووبێت، بەڵام گوتەبێژەکەی دەزگای ئاسایشی هەرێمی کوردستان (سلێمانی) نە پشتڕاستی کردەوە و نە رەتی کردەوە.

راگەیێندراوەکە لەکاتێکدایە، بەهۆی جەنگی نێوان ئێران و ئیسرائیلەوە، لە چەند رۆژی رابردوودا لە ناوچە جیاکانی هەرێمی کوردستان چەند جارێک درۆن یان پارچە درۆن یان پاشماوەی مووشەک کەوتوونەتە خوارەوە و زیانی گیانییان نەبووە.

 بەیانیی ئەمڕۆش لە سنووری ناحیەی سەنگاو لە سنووری پارێزگای سلێمانی درۆنێک کەوتەخوارەوە و لەنێو زەویی جووتیارێک چاڵێکی دروستکردبوو. هاوکات ئاگرێکی لە دەوروپشتی خۆی خستەوە.

 هەر ئەمرۆ لە ناوچەی هوانە لە سلێمانی ئاگر لە دوو کارگەی دروستکردنی تەختە و پالێت کەوتەوە. خاوەنی یەکێک لە کارگەکان بە رووداوی گوت، هۆکارەکەی شۆرتی کارەبا بووە.

سەرچاوە: ڕووداو