ئەردۆغان وەزیرێکی پێشووی تورکیای کردە نوێنەری تایبەتی عێراق

بریارەکەی رەجەب تەیب ئەردۆغان بە واژۆی خۆیەوە، لە ژمارەی رۆژی پێنجشەممە، 8-5-2025، لە رۆژنامەی فەرمیی تورکیا بڵاوکرایەوە.

 لە بڕیارەکەدا هاتووە: "بە گوێرەی بڕگەکانی 4 و 161ـی بڕیارنامەی سەرۆکایەتیی کۆمار، فەیسەڵ ئەرۆغڵو، وەکو نوێنەری تایبەتیی کۆماری عێراق دەستبەکار بووە".

ئەرۆغڵو لە ماوەی رابردوودا زۆرترین پۆستی تایبەت بە ئاو و ئاوەڕۆ لە شوێنە جیاوازەکان هەبووە و دوو جاریش پۆستی وەزیری هەبووە. ساڵی 2011 تاوەکو 2018 وەزیری دارستان و ئاوی تورکیا بووە.

ئەم هەنگاوە لەکاتێکدایە کە رۆژی پێنجشەممە، 8-5-2025، محەممەد شیاع سوودانی، سەرۆکوەزیرانی عێراق بە یاوەریی شاندێکی باڵا بەرەو ئەنقەرە بەڕێکەوت، بڕیارە بەشداری کۆبوونەوەکانی ئەنجوومەنی باڵای تورکیا - عێراق بۆ هاوکاریی ستراتیژی بکات.

 فەیسەڵ ئەرۆغڵو کێیە؟

رۆژی 18-8-1948 لە پارێزگای ئافیۆن کاراهیساری تورکیا لەدایکبووە

 کۆلێژی بیناسازیی لە زانکۆی تەکنیکیی ئیستەنبووڵ تەواوکردووە

هەروەها بەشی مێژووی لە زانکۆی ئیستەنبووڵ خوێندووە

1984 بووەتە پرۆفیسۆر

1999 بووەتە بەڕێوەبەری گشتیی فەرمانگەی ئاو و ئاوەڕۆی ئیستەنبووڵ (ISKI) 

2004 بووەتە بەڕێوەبەری گشتیی کاروباری ئاو

 2007 بووەتە پەرلەمانتاری ئاکپارتی

 2007-2011 وەزیری ژینگە و دارستانی تورکیا بووە

2011-2018 وەزیری دارستان و ئاوی تورکیا بووە

سەرچاوە: ڕووداو