زیانلێکەوتووان قەرەبوو دەکرێنەوە
ئەنجومەنی وەزیرانی عێراق بڕیاریدا بڕە پارەیەک وەک قەرەبووی دارایی بۆ کەسوکاری شەهیدان و بریندارانی ئەو هێرشە سەربازییانە تەرخان بکات کە لەم دواییانەدا کراونەتە سەر خاکی عێراق، بڕیارەکە قوربانیانی هەرێمی کوردستانیش دەگرێتەوە.
ئەمڕۆ سێشەممە، ٢٨ـی ٤ـی ٢٠٢٦، ئەنجومەنی وەزیرانی عێراق لە دانیشتنی ئاسایی خۆیدا ڕەزامەندیی نیشاندا لەسەر تەرخانکردنی بودجەیەکی تایبەت بۆ قەرەبووکردنەوەی ئەو هاووڵاتییانەی بوونەتە قوربانیی پەرەسەندنە سەربازییەکانی ئەم دواییەی ناوچەکە.
بەپێی بڕیارەکە، قەرەبووەکە سەرجەم ئەو کەسانە دەگرێتەوە کە لە ئەنجامی هێرشە ئاسمانی و درۆنییەکان لە پارێزگاکانی عێراق و هەرێمی کوردستان گیانیان لەدەستداوە یان بریندار بوون.
ئەم هەنگاوە دوای ئەوە دێت کە لە ماوەی ڕابردوودا بەهۆی ململانێی نێوان ئەمریکا، ئیسرائیل و ئێران لە ناو خاکی عێراق، چەندین هاووڵاتیی مەدەنی و کارمەندی ئەمنی بوونەتە قوربانی.
