وەزارەتی دارایی هەرێمی کوردستان: مووچەی مانگی تەممووز خرایە سەر هەژمارەکەمان
وەزارەتی دارایی هەرێمی کوردستان رایگەیاند، تەمویلی مووچەی مانگی تەممووز خرایە سەر هەژماری بانکیی وەزارەتی دارایی.
ئەمڕۆ سێشەممە، وەزارەتی دارایی هەرێمی کوردستان رایگەیاند، 956 ملیار و 928 ملیۆن دینار وەک تەمویلی مووچەی مانگی تەممووزی فەرمانبەران و مووچەخۆرانی هەرێمی کوردستان خرایە سەر هەژماری بانکیی وەزارەتی دارایی و ئابووری هەرێمی کوردستان لە لقی هەولێری بانکی ناوەندیی عێراق.
تەیف سامی، وەزیری دارایی حکومەتی عێراق واژۆی لەسەر ناردنی مووچەی مانگی 7 کردووە.
بەگوێرەی زانیارییەکانی ڕووداو ، ئەگەر لە ماوەی 10 بۆ 15 رۆژی داهاتوو، وەزارەتی دارایی هەرێم تەرازووی پێداچوونەوە و 120 ملیار دیناری داهاتی نانەوتی بۆ بەغدا بنێرێت، ئەوا مووچەی مانگی 8 دەنێردرێت.
وەزارەتی دارایی هەرێمی کوردستان 01-09-2025 لیستی مووچەی مانگی 6ـی بڵاوکردەوە و لە چەند رۆژێکدا دابەشکرا.
