بەرهەمهێنانی نەوت لە کێڵگەکانی ئەتروش و سەرسنک دەستپێدەکاتەوە
کۆمپانیای شاماران راپۆرتی دارایی چارەکی دووەمی خۆی بڵاو کردەوە و رایگەیاند: لە بلۆکی ئەتروش بە تەواوی تواناوە دەستمان بە بەرهەمهێنانی نەوت کردەوە، بەڵام لە سەرسنک بە نیوەی تواناوە دەستمان بە بەرهەمهێنانی نەوت کردووەتەوە.
لەبارەی زیانەکانەوە ئەو کۆمپانیایە دەڵێت: "لە کێڵگەی سەرسنک سێ کۆگای نەوت و بۆرییەکانیان زیانیان بەرکەوتووە. تاوەکو کۆتایی مانگی 10 بەهۆی زیانەکان ناتوانین بە تەواوی توانا، نەوت لە سەرسنک بەرهەمبهێنین."
کۆمپانیای HKN دوای راوێژکردن لەگەڵ حکومەتی هەرێمی کوردستان و "کاتێک لە سەلامەتیی دۆخەکە دڵنیابووەوە"، دەستی بە بەرهەمهێنان لە هەردوو بلۆکی سەرسنک و ئەتروش کردووەتەوە.
کۆمپانیای شاماران لە کێلگەکانی سەرسنک و ئەتروش هاوبەشی کۆمپانیای ئەمریکی ( ئێچ کەی ئێن)ـە و ئێچ کەی ئێن کارکەرە لەو دوو کێڵگەیە نەوت بەرهەمدەهێنێت.
کۆمپانیای شاماران لە کێڵگەی ئەتروش 50٪ـی پشکەکانی بەرژەوەندیی بەدەستەوەیە و لە کێڵگەی سەرسنکیش خاوەی 18٪ـی پشکەکانە.
سەرچاوە: ڕووداو
