لیژنەی لێکۆڵینەوە: بە درۆن هێرشکراوەتە سەر کۆرمۆر و هێرشکەران ناسراونەتەوە

دوو درۆنەکە لە باشووری کێڵگەکەوە لە ناوچەکانی رۆژهەڵاتی قەزای خورماتوو ئاراستە کراون و ئەمە 11ـەمین ھێرشە کە لەو ناوچەیەوە کرابێتە سەر کێڵگەکە.

 

بە گوێرەی ئەنجامەکان، گەیشتوون بەو کەسانەی کە ئەو هێرشەیان کردووە، کە بە کەسانی "دەرچوو لە یاسا" ناوبراون و فەرمانی دەستگیرکردن بۆ هەندێکیان هەبووە و هێزە ئەمنییەکان بەدوایاندا دەگەڕێن. 

 

لە راگەیێنراوەکەدا هاتووە: "لەدوای دیاریکردنی ئەو کەسانەی کە هێرشەکەیان کردووە، هێزە ئەمنییەکان دەستیان کردووە بە کۆکردنەوەی بەڵگەی تەکنیکی بە مەبەستی تۆمەتبارکردنیان و بردنیان بۆ بەردەم دادگە.

 

لیژنەی لێکۆڵینەوەکە راسپاردەی چەند رێوشوێنێکی خستووەتەڕوو بۆ پاراستنی کێڵگەی کۆرمۆر بە هاوئاهەنگی لەگەڵ حکومەتی هەرێمی کوردستان:

 

1- دووبارە بڵاوکردنەوەى هێزە ئەمنییەکان لە کەرتی ئۆپەراسیۆنەکانی رۆژهەڵاتی سەلاحەدین بۆ پڕکردنەوەی هەر بۆشاییەکی ئەمنی و بەردەوامیدان بە هاوئاهەنگیی نێوان دەزگا ئەمنیی و هەواڵگری و ئەو هێزانەی کە ئەو ناوچەیان بەدەستەوەیە، لەگەڵ گرەنتیکردنی یەک سەرکردایەتییان.

 

2- فەرماندان بە وەزارەتی بەرگری و ناوخۆ و دەستەی حەشدی شەعبی بە گۆڕینی فەرماندەکانیان لەو ناوچانە بە فەرماندەی بەتوانا.

 

3- پەرەپێدان و بەهێزکردنی کەناڵەکانی پەیوەندیی هەواڵگری لەنێوان دەزگا هەواڵگرییەکانی فیدراڵ و هاوتاکانیان لە هەرێمی کوردستان.

 

4- وەزارەتی بەرگری سیستمی بەرگریی ئاسمانی بە هاوئاهەنگی لەگەڵ حکومەتی هەرێمی کوردستان بۆ کێڵگەکە دابین بکات و بیپارێزێت.

 

5- تووندکردنەوەی رێکارەکانی بەکارهێنان و گواستنەوەی درۆن بە هەموو جۆرەکانییەوە، کە دەبێت بە رەزامەندیی فەرمیی لایەنی پەیوەندیدار بێت.

 

6-  داوا لە ئەنجوومەنی باڵای دادوەری بکرێت کە لیژنەیەک لەگەڵ ئاژانسە ئەمنیی و هەواڵگرییەکان پێكبهێنێت بۆ بەدواداچوونی لێکۆڵینەوە لەو دۆسیەیە.

 

لە راگەیێندراوەکەدا هاتووە: "کاری لیژنەی لێکۆڵینەوەکە بەردەوامە تاوەکو گەیشتن بە سەرجەم ئەو کەسانەی کە لەو رووداوەوە گلاون، کە سەروەریی عێراق و سامانە ئابوورییەکەی بە ئامانج گرتووە و ئەوە کارێکی تیرۆریستیی مەترسیدارە بە مەبەستی لێدان لە هەوڵەکان بۆ هێنانە کایەی سەقامگیریی ئەمنی و ئابووری، و ئەم کارە تیرۆریستییە بەبێ سزادانی بکەرانی تێناپەڕێت و رێوشوێنی یاسایی تووند لە دژیان دەگیرێتەبەر".

 

رۆژی 26ی تشرینی دووەمی 2025 هێرشکرایە سەر کێڵگەی کۆرمۆر و بەهۆیەوە کۆگەیەکی گەورەی کێڵگەکە ئاگری گرت و بەهۆیەوە بەرهەمهێنانی گاز لە کێڵگەکە وەستا. 

 

کاتێک بەرهەمهێنانی گاز وەستا، بەرهەمهێنانی کارەباش لە 24 کاژێرەوە کەمبووەوە بۆ 5 کاژێر لە رۆژێکدا. دوای دوو رۆژ لە هێرشەکە بە فەرمانی سەرۆکوەزیرانی عێراق لیژنەیەکی ئەمنی سەردانی کێڵگەی کۆرمۆریان کرد و دەستیان بە لێکۆڵینەوە کرد. 

 سەرچاوە:رووداو