ترەمپ بۆ سەرکردەکانی جیهان: دڵنیابن دەرگای فڕۆکەکانتان لەکاتی کێشە لەگەڵ هاوژینەکانتان داخراوە

رۆژی هەینی 31ی ئایاری 2025 دۆناڵد ترەمپ، سەرۆکی ئەمریکا لە کۆنفرانسێکی رۆژنامەڤانیدا لە واشنتن لەبارەی رووداوەکەی نێوان ئیمانوێل ماکرۆن، سەرۆکی فەرەنسا و هاوژینەکەی پرسیاری لێکرا.

ترەمپ رووداوەکەی بە "شتێکی خراپ" ناوبرد و بە گاڵتەوە داوای لە سەرکردەکانی جیهان کرد، ئەگەر لەگەڵ هاوژینەکانیان کێشەیان بۆ دروستبوو، "دڵنیا ببنەوە لەوەی دەرگاکە داخراوە." سەرۆکی ئەمریکا گوتیشی، "من قسەم لەگەڵی [لەگەڵ ماکرۆن] کرد و ئەو باشە. ئەوان باشن. ئەوان دوو کەسی زۆر باشن. زۆر باش دەیانناسم و نازانم ئەوە لەسەر چی بوو، بەڵام زۆر باش دەیانناسم و دەزانم کە ئەوان باشن."

 سەرۆکی ئەمریکا کە ماوەیەکی درێژە پەیوەندییەکی گەرموگوڕی هاوڕێیانەی لەگەڵ ماکرۆن هەیە، رایگەیاند، دوای رووداوەکە پەیوەندیی بە ماکرۆن و هاوژینەکەیەوە کردووە.

 رۆژی 25ی ئەم مانگە، ماکرۆن و بریجیتی هاوژینی، گەیشتنە ڤێتنام. لە فڕۆکەخانەی هانۆی، دەرگای فڕۆکەکە کرایەوە و چاوی کامێراکان لەسەر سەرۆکی فەرەنسا بوو. ماکرۆن لەبەر دەرگاکە وەستا و چاوەڕێی چوونەدەرەوەی دەکرد. لەو کاتەدا بریجیتی هاوژینی، دەستی درێژ کرد و پاڵێکی بە رووخساری ماکرۆنەوە نا.

 ماکرۆن حەپەساو دەرکەوت، سەیری لای کامێرای رۆژنامەڤانانی کرد، دەستی راستی بۆ سڵاوکردن بەرزکردەوە و رووی کردەوە لای خانمی یەکەمی فەرەنسا، کە لە ڤیدیۆکەدا تەنیا دەستی دیارە.

 دواتر ماکرۆن روونکردنەوەی لەسەر رووداوەکەدا و گوتی، ئەوەی روویداوە، گاڵتەی نێوان خۆی و هاوژینەکەی بووە.

سەرچاوە: ڕووداو