مانگی 4 عێراق 91 ملیۆن بەرمیل نەوتى هەناردە کردووە؛ 211 هەزاری لە کەرکووک بووە

بەگوێرەى ئامارێک کە رووداو لە بەشى گواستنەوەى دەریایی و وشکانیى کۆمپانیاى بەبازاڕکردنى نەوتى عێراق (سۆمۆ) شیکاریی بۆ کردووە، لە نیساندا 21 رۆژ نەوت لە رێگەى بەندەرەکانى بەسرەوە هەناردە کراوە. تێکڕاى نەوتى هەناردەکراوى عێراق لەو ماوەیەدا 91 ملیۆن و 275 هەزارو 696 بەرمیل بووە.

 بەگوێرەى ئەو ئامارە، عێراق 21 رۆژ نەوتى لە رێگەى بەندەرى بەسرە بارکردووە بۆ هەناردەکردن، 20 ملیۆن بەرمیل نەوتى لە جۆرى قورس و ئەوى دیکەى مامناوەند بووە.

 لەو نەوتەی هەناردە کراوە، 19 ملیۆن و 605 هەزار و 696 بەرمیلی لە کێڵگەى گەیارە بووە لە سنوورى پارێزگاى نەینەوا، کە بە تەنکەر گوێزراوەتەوە بۆ بەندەرى خۆر زوبێر و لەوێوە هەناردە کراوە. هەروەها 211 هەزار و 767 بەرمیل نەوتی کێڵگەکانی کەرکووک بە تانکەر هەناردەی ئوردن کراوە.

 بەگوێرەى رێککەوتنى نێوان عێراق و ئوردن، نرخى هەر بەرمیلێکى نزیکەى 16 دۆلار لە نرخى بازاڕ کەمترە. نەوتى هەناردەکراوى عێراق لە رێگەى بەندەرەکانى بەسرەوە بە رێگەى وشکانى بۆ ئوردن، 91 ملیۆن و 487 هەزار و 463 بەرمیل نەوت بووە، کە رۆژانە دەکاتە زیاتر لە سێ ملیۆن بەرمیل نەوت.

 بەگوێرەى یاسای بودجەى عێراق، دەبێت رۆژانە سێ ملیۆن و 500 هەزار بەرمیل نەوت هەناردە بکرێت بۆ پارەدارکردنى بودجەکەى، کە زیاتر لە 200 تریلیۆن دینارە.

سەرچاوە: ڕووداو