سەرۆک بارزانی سوپاسی هەڵوێست و پشتیوانییەکانی ئەمریکا دەکات

ئەمڕۆ یەکشەممە، 10ـی ئابی 2025، سەرۆک مەسعود بارزانی لە پیرمام، پێشوازی لە هەریەک لە گویندەلن گرین، کۆنسووڵی نوێی ئەمریکا لە هەولێر و ستیڤ بیتنەر، کۆنسووڵی پێشووی ئەو وڵاتە لە هەرێمی کوردستان کرد.

لە دیدارەکەدا، سەرۆک بارزانی هیوای سەرکەوتنی بۆ هەردوو کۆنسووڵ خواست و پێزانینی تایبەتی هەبوو بۆ ستیڤ بیتنەر، کۆنسووڵی پێشووی ئەمریکا، کە "لە ماوەی کارکردنیدا رۆڵێکی بەرچاوی لە پەرەپێدانی پەیوەندییەکانی نێوان ئەمریکا و هەرێمی کوردستان، کاری هاوبەش و پڕۆسەی چاکسازی لە وەزارەتی پێشمەرگەدا گێڕاوە".

سەرۆک بارزانی "هەروەها پشتیوانییەکانی ئەمریکای لە دوای کۆڕەوی ساڵی 1991، رووخانی رژێمی پێشووی عێراق و شەڕی دژی تیرۆرستانی داعش بەرز نرخاند".

 بارەگای بارزانی دەڵێت، ستیڤ بیتنەر، کۆنسووڵی پێشووی ئەمریکا "سوپاسی ئەو پاڵپشتییەی کرد کە لە ماوەی کارکردنیدا لەلایەن سەرۆک بارزانی و دامەزراوەکانی حکومەتەوە لێی کراوە بۆ راییکردنی کارەکانی". بیتنەر جەختی لە پەیوەندیی پتەوی نێوان هەردوولا کردەوە و رۆڵی سەرۆک بارزانی لە ئاساییکردنەوەی دۆخی عێراق و هەرێمی کوردستانی بەرز نرخاند، هاوکات تیشکی خستە سەر بارودۆخی ئێستا، هەڵبژاردنی داهاتووی عێراق و پێکهێنانی کابینەی نوێی حکومەتی هەرێمی کوردستان.

هەر لەو دیدارەدا، گویندەلن گرین، کۆنسووڵی نوێی ئەمریکا، رۆڵی سەرۆک بارزانی بە "رۆڵێکی ئەفسانەیی" وەسفکرد و دووپاتیکردەوە کە پەیوەندیی بەهێز و دوولایەنەی نێوان ئەمریکا و هەرێمی کوردستان بەردەوام دەبێت.

تەوەرێکی دیکەی کۆبوونەوەکە تایبەت بوو بە گفتوگۆکردن لەبارەی دوایین گۆڕانکاری و ئاڵنگارییەکانی ناوچەکە، پرسی پڕۆسەی ئاشتی لە تورکیا و بارودۆخی سووریا.

سەرچاوە: ڕووداو