باکرهان لەبارەی پێشنیازەکەی باخچەلی: بۆچی سەرۆککۆماریش کورد نەبێت؟

تونجەر باکرهان، هاوسەرۆکی دەم پارتی رۆژی سێشەممە، 22 ـی تەممووزی 2025 پێش کۆبوونەوەی ئەنجوومەنی پارتەکەی لە ئەنقەرە کۆنگرەیەکی رۆژنامەڤانی سازدا.
لە بەشی پرسیار و وەڵامی کۆنفرانسە رۆژنامەڤانییەکەدا، دەربارەی پێشنیازەکەی دەوڵەت باخچەلی، سەرۆکی مەهەپە کە لە 18 ـی تەمموزی 2025 کە لە کۆبوونەوەیەکی داخراوی دەستەی بەڕێوەبەریی ناوەندی و دەستەی دیسپلینی ناوەندی حیزبەکەی، گوتبووی: ''با سەرۆککۆمار دوو یاریدەدەری هەبێت، یەکێکیان کورد و ئەوی دیکەیان عەلەوی بێت" پرسیار لە باکرهان کرا.

 باکرهان لە وەڵامدا گوتی: "بۆچی سەرۆککۆماریش کورد نەبێت؟ ئێمە بەربژێرین بۆ بەڕێوەبردن".
ئاماژەی بەوەدا، "لە قۆناخی داهاتوودا هاوکێشەی سیاسی و زەمینە چۆن دەبێت، ئەوە زۆر نازانم، بەڵام بێگومان بەشداریکردنی هەموو رەنگ و جیاوازییەکانی وڵاتەکەمان لە بەڕێوەبردن و نوێنەرایەتیکردنیان، شتێکی بەنرخ و بەهادارە".

 باکرهان، لە وەڵامی پرسیارێکدا سەبارەت بە سەردانەکەی دوێنێی ئیبراهیم کاڵن، سەرۆکی دەزگای هەواڵگریی- میت بۆ لای فراکسیۆنی دەم پارتی لە پەرلەمان گوتی: "کۆبوونەوەکەمان لەگەڵ هەواڵگریی نیشتمانی نهێنییە. بۆیە ناڵێم باسی چیمان کردووە، بەڵام باش بەڕێوەچوو، ئەرێنی بوو. دۆخەکەمان هەڵسەنگاند، ئەوان زانیارییان پێداین. تەنیا دەتوانم ئەوەندە بڵێم."

ئیبراهیم کاڵن، سەرۆکی دەزگای هەواڵگریی تورکیا-میت، رۆژی دووشەممە 21ـی تەمموزی 2025 دوای کۆبوونەوەی لەگەڵ دەوڵەت باخچەلی سەرۆکی پارتی بزووتنەوەی نەتەوەیی-مەهەپە و فراکسیۆنی ئاکپارتی لە پەرلەمان، لەگەڵ فراکسۆینی دەم پارتیش کۆبووەوە.

 کاڵن، سەبارەت بە پڕۆسەی چەکدانانی پەکەکە سەردانی ئەو پارتە سیاسیانە دەکات کە لە پەرلەمانی تورکیا فراکسیۆنیان هەیە.

سەرچاوە: ڕووداو