لە سۆران ژمارەیەک کامێرای تۆمارکردنی تیژڕۆیی بەکاردەخرێن
هاتووچۆی سۆران رایگەیاند، ژمارەیەک کامێرای تۆمارکردنی تیژڕۆیی بە شێوەی ئەزموونی دەخرێنەکار. گوتەبێژەکەشیان دەڵێت، "لە 1ی ئەیلوولی 2025ـەوە، سەرپێچی تۆمار دەکەن."
ئەمڕۆ یەکشەممە 24ی ئابی 2025 عەقید موحسن شەمزینی، گوتەبێژی هاتووچۆی ئیدارەی سەربەخۆی سۆران راگەیاند، کامێراکان لە ئەمڕۆوە بە شێوەیەکی ئەزموونی دەخرێنەکار.
بەڕێوەبەرایەتیی هاتووچۆی ئیدارەی سەربەخۆی سۆران رایگەیاند، لە جووتسایدی خەلیفان – ناوشار، جووتسایدی زانكۆ - باڵەخانەی ئیدارەی سەربەخۆ (دێلزیان)، ترافیكلایتی سۆران - رەواندز (حریق) و گەڕەكی كانی (ئازادی) کامێرای چاودێریی تیژڕۆیی دانراوە و خێرایی رێگەپێدراو 60 کیلۆمەتر مەترە لە کاژێرێکدا.
بە گوتەی گوتەبێژی هاتووچۆی سۆران، لەو ژمارە کامێرایە، تەنیا یەکیان خاڵ بۆ خاڵ (point to point)ـە و خێرایی رێگەپێدراو 100 کیلۆمەترە لە کاژێرێکدا؛ ئەویش لە جووتسایدی خەلیفان – سپیلک دانراوە؛ ئەوانی دیکە کامێرای جێگیرن.
لەبارەی شوێن و خێرایی رێگەپێدراوی کامێراکانی دیکەوە، عەقید موحسن شەمزینی روونیکردەوە، "بەشێکی دیکە لە کامێرەکانی چاودێریی تیژڕەوی لە جووتسایدی گشتیی سۆران (نەخۆشخانەی ئاشتی)، رێگەی سۆران - مێرگەسۆر (گوندی ناومێرگان)، رێگەی رێزان – بلێ، رێگەی كاولۆكان - جوندیان، رێگەی سۆران - گوندی خەلكان (نزیک پاركی گوڵان) دانراون و خێرایی رێگەپێدراو 80 کیلۆمەترە لە کاژێرێکدا.
سەرچاوە: ڕووداو
