نێچیرڤان بارزانی لەبارەی کۆبوونەوەی لەگەڵ ئەحمەد شەرع: تاوتوێی ئامانجی هاوبەشمان کرد
نێچیرڤان بارزانی، سەرۆکی هەرێمی کوردستان و ئەحمەد شەرع، سەرۆکی سووریا لە پەراوێزی کۆڕبەندی ئەنتاڵیا کۆبوونەوە. نێچیرڤان بارزانی دەڵێت، "تاوتوێی بەهێزکردنی پەیوەندییەکانی نێوان عێراق، هەرێمی کوردستان و سووریامان کرد".
کۆبوونەوەکە بەیانیی ئەمڕۆ هەینی، 17-4-2026 بوو لە ئەنتاڵیای تورکیا.
سەرۆکی هەرێمی کوردستان لە هەژماری خۆی لە ئێکس رایگەیاند، "ستایشی سەرۆک شەرعم کرد بۆ هەوڵە بەردەوامەکانی بە مەبەستی سەقامگیرکردنی سووریا و ئەو پێشکەوتنە بەرچاوەی لە جێبەجێکردنی رێککەوتنامەی لەگەڵ هەسەدەدا بەدیهاتووە".
دەشڵێت، "تاوتوێی بەهێزکردنی پەیوەندییەکانی نێوان عێراق، هەرێمی کوردستان و سووریامان کرد بۆ پێشخستنی ئامانجە هاوبەشە ئەمنی و ئابوورییەکان".
کۆڕبەندی ئەنتاڵیا لەلایەن وەزارەتی دەرەوەی تورکیاوە رێکخراوە. خولی ئەم ساڵ لەژێر ناوی "بەڕێوەبردنی نادڵنیاییەکان لە نەخشەسازیی سبەیدا" بەڕێوەدەچێت و لە (17 تاوەکو 19ی نیسانی 2026) بەردەوام دەبێت.
