فەرەنسا لەبارەی ئاڵۆزییەکانی سووریا: دەبێت تاوانباران سزا بدرێن

رۆژی شەممە، 8ـی ئاداری 2025، وەزارەتی دەرەوەی فەرەنسا راگەیێندراوێکی سەبارەت بە تووندوتیژییەکانی رۆژئاوای سووریا بڵاوکردەوە و رایگەیاند، پێویستە "دڵنیایی لە لێکۆڵینەوەیەکی سەربەخۆ بدرێت کە ببێتە هۆی ئاشکراکردنی راستییەکانی پشت ئەو تاوانانە". دەشڵێت، دەبێت "تاوانباران سزا بدرێن".

 لە رۆژی پێنجشەممەوە، هەرسێ پارێزگای لازقییە، تەرتووس و بانیاس کە دانیشتووانەکەی زۆرینە عەلەوین، رووبەڕووی پێکدادانێکی قورس و خوێناوی بوونەوە. شەڕ لە نێوان دەسەڵاتی نوێی سووریا و چەند گرووپێک روویدا کە دەگوترێت لایەنگری دەسەڵاتی ئەسەدن.

هاوکات وەزارەتی دەرەوەی نەمسا لە ئێکس بڵاویکردەوە، "داوا لە هەموو لایەنەکان دەکەین گرژییەکان کەمبکەنەوە و تاوانبارانیش دادگایی بکەن". ئاماژە بەوەش دەکەن، پێویستە "دەسەڵاتی دیفاکتۆی سووریا دڵنیایی لە گواستنەوەیەکی سیاسی گشتگیر و ئاشتییانە بدەن."

 بە گوێرەی سەرچاوە خۆجێییەکانی سووریا، تاوەکو ئێستا لەو شەڕانەدا 532 هاووڵاتیی سڤیلی عەلەوی کوژراون. عەلەوییەکان کەمینەیەکی ئایینیین و بەشار ئەسەد، سەرۆکی پێشووی وڵاتەکەش لە خۆیان بوو. لە 23.5 ملیۆن دانیشتووی سووریا نزیکەی دوو بۆ سێ ملیۆنیان عەلەویین.

 تاوەکو ئێستا نازانرێت هۆکاری راستەقینەی رووداوەکان چی بوون و چی لایەنێك دەستپێشخەر بووە؛ بەڵام وەزارەتی ناوخۆی حکومەتی نوێی سووریا هۆکارەکەی بۆ کوژرانی 15 ئەفسەری ئاسایش و پۆلیس لە بۆسەیەکی گرووپە چەکدارەکان لە پارێزگەی لازقییە گەڕاندەوە.

سەرچاوە: ڕووداو