پلانی پێنج ساڵەی عێراق؛ 84 تریلیۆن دینار بۆ کەرتی تایبەت تەرخان دەکرێت

عەبدولزەهرە هینداوی، گوتەبێژی وەزارەتی پلاندانانی عێراق  راگەیاند، وەزارەتەکەیان لە چوارچێوەی پلانی گەشەپێدانی نیشتمانی(2024-2028)، "کار لەسەر پاکێجێکی فراوانی پڕۆژەکان دەکات کە ئامانج لێیان باشترکردنی خزمەتگوزارییەکان، هەمەجۆرکردنی ئابووری وکەمکردنەوەی رێژەی هەژاری و بێکارییە."

سەبارەت بە چۆنیەتیی بەڕێوەچوونی پڕۆژەکان، هینداوی ئاماژەی بەوە کرد"سیستمێکی پێشکەوتوو"ی بەڕێوەبردن بەناوی (IDMS) پەیڕەو دەکرێت: "ئەمسیستمە بانکێکی زانیارییە کە هەموو وەزارەت و پارێزگاکان پێکەوە دەبەستێتەوە بۆ ئەوەی بە شێوەی ئۆنلاین چاودێریی هەموو پڕۆژەکان بکرێت. جگە لەوەش، تیمە مەیدانییەکانی وەزارەت بەردەوام سەردانی پڕۆژەکان دەکەن بۆ چارەسەرکردنی ئەو گرفتە تەکنیکییانەی دێنە پێش کارەکان."

گوتەبێژی وەزارەتی پلاندانان ئاماژەی بەوە کرد، کارە لەپێشینەکانی حکومەت بریتین لە "تەواوکردنی پڕۆژە ستراتیژییە گەورەکان، لە سەرووی هەمووشیانەوە پڕۆژەی رێگەی گەشەپێدان و بەندەری فاو، لەگەڵ پڕۆژەکانی ژێرخانی ئاو، ئاوەڕۆ، رێگاوبان، تەندروستی و پەروەردە."

بەپێی گوتەکانی هینداوی، یەکێک لە تەوەرە سەرەکییەکانی پلانی حکومەت،"زیادکردنی رۆڵی کەرتی تایبەتە لە ئابووری نیشتمانیدا." باسی لەوەش کرد کە"قەبارەی وەبەرهێنانی کەرتی تایبەت لەم پلانەدا دەگاتە نزیکەی 84 تریلیۆن دینار، کە دەکاتە 35%ی کۆی گشتی وەبەرهێنانەکان لە عێراق."

وەک گوتەبێژی وەزارەتی پلاندانان دەڵێت، "ئەم هەنگاوە بە ئامانجیکەمکردنەوەی پشتبەستنی عێراقە بە نەوت و گۆڕینی ئابووری وڵات بۆئابوورییەکی بەرهەمهێنەر، بە جۆرێک کە فشار لەسەر دامەزراندنی حکومی کەمبکاتەوە و هەلی کار لە کەرتی تایبەتدا بڕەخسێنێت."

سەرچاوە: رووداو